«Ժողովուրդ». Խորհրդարանական ընդդիմությունը հայտնվել է ԱԺ-ից դուրս մնալու վտանգի առաջ

Խորհրդարանական ընդդիմությունն, ըստ էության, հայտնվել է խորհրդարանից դուրս մնալու վտանգի առաջ: Ակնհայտ է, որ առաջիկայում հիմնական ընտրապայքարն ընթանալու է քաղաքական դաշտի երեք հիմնական խաղացողների՝ Հայ ազգային կոնգրեսի, ԲՀԿ-ի և ՀՀԿ-ի միջև: Ու հիմա, երբ խոսվում ու քննարկվում են տարբեր քաղաքական կոնֆիգուրացիաներ, դրանցում չկան ո՛չ ՀՅԴ-ն, ո՛չ «Ժառանգություն»-ը և ո՛չ էլ կոալիցիայի անդամներից ՕԵԿ-ը, գրում է «Ժողովուրդ» թերթը։

Ավելին, նույնիսկ խոսակցություններ կան, որ ՀՅԴ-ն նաև լուրջ ֆինանսկական խնդիրներ ունի՝ առաջիկա քարոզարշավը նորմալ առաջ տանելու համար: Ինչպես հայտնի է՝ այս կուսակցության հիմնական ֆինանսկական միջոցները եկել են սփյուռքի իրենց կառույցներից: Բայց քանի որ ՀՅԴ հայաստանայան ու սփյուռքի կառույցների միջև հարաբերություններն այնքան էլ լավ չեն, հիմա ֆինանսական խնդիրներ են ի հայտ եկել: Առավել ևս, որ ՀՅԴ համամասնական ցուցակում ընդգրկված պատգամավորներից ոչ բոլորն են շահագրգռված գումարներ ներդնել քարոզարշավին: ՀՅԴ-ականներն, իհարկե, հերքում են այս լուրերը: ԳՄ անդամ Արա Նռանյանն ասաց, որ բորոլր ընտրություններից առաջ միշտ էլ նման «ավանդական խոսակցություններ» շրջանառվում են, բայց երբեք դրանք իրականությանը չեն համապատասխանում: Իսկ ԱԺ ՀՅԴ խմբակցության քարտուղար Արտյուշա Շահբազյանն այդ լուրերը որակեց որպես «հիմարություն»:

Ինչ վերաբերում է «Ժառանգությանը», ապա այստեղ խնդիրն ավելի քան լուրջ է: ԱԺ-ում այս կուսակցության հայտնվելու շանսերն առավել քան քիչ են: Պատճառները տարբեր են: Հիմա կրկին խորհրդարանում հայտնվելու համար այս կուսակցությունը մտմտում է դաշինք կազմելու շուրջ, իսկ որպես պոտենցիալ գործընկեր՝ համարում են «Ազատ դեմոկրատներ»-ին: Ուշագրավն այն է, որ «Ազատ դեմոկրատներ»-ից ոմանք տարբեր առիթներով չեն ժխտել այդ քննարկումները՝ համոզված, որ գաղափարախոսական դաշտի վրա իրենց միավորումը թույլ կտա ձայներ հավաքել: Սակայն «Ժառանգություն»-ը չի շտապում այդ մասին կոնկրետ հայտարարություններ անել: