«Ֆլեշի» Բարսեղի և Տիգրան Սարգսյանի հերթական բիզնես նախագիծը

ԼՈՒՐԵՐ.com-ի տեղեկություններով` 2012 թվականի հոնվարի մեկից քաղաքական որոշում է կայացվել, որ ավտոմեքենայի յուղի ներկրման դաշտում էլ պետք է մոնոպոլիա ստեղծել և այն տալ դարձյալ ղարաբաղյան կլանի ներկայացուցիչ, խոշոր օլիգարխ Բարսեղ Բեգլարյանին՝ Ֆլեշի Բարսեղին: Առաջին քայլը, որ արեց այդ ուղղությամբ Բարսեղ Բեգլարյանը, շուրջ 10 միլիոն ԱՄՆ դոլարի ներդրումն էր ոլորտում: Նա այդ գումարով մինչ ամանորը հսկայական ծավալի յուղ ներկրեց հանրապետություն՝ մաքսազերծման համար կոպեկներ մուծելով, իսկ մնացած ներկրողների համար հունվարի 1-ից մաքսազերծման գները շեշտակի աճեցին: Արդյունքում դաշտում մնաց Ֆլեշի Բարսեղը. և այժմ նա էլ եղանակ է ստեղծում ոլորտում:

ՀՀ վարչապետի հետ ունեցած մտերիմ հարաբերությունների արդյունքում է, որ Ֆլեշին նման լիազորություններ է տրվում: Եվ սա դեռ ամենը չէ:

Այսօր ՀՀ կառավարության նիստի ժամանակ վարչապետ Տիգրան Սարգսյանը Աղքատության հաղթահարման ծրագրի շրջանակներում հայտարարել է. «…Երկու տարի է՝ գյուղատնտեսությունը պահում ենք մեր ուշադրության կենտրոնում և տրամադրում ենք այնպիսի օժանդակություն, որը տալիս է իրական արդյունքներ: Այսօր հերթական ծրագիրն ենք հաստատելու, որի նպատակն է դիզվառելիքը հասանելի դարձնել բոլոր համայնքների համար մատչելի գներով, ինչը կնպաստի նրան, որ այս տարվա գարնանացանի ընթացքում էապես կընդլայնվեն մշակվող հողատարածքները: Դրա համար մենք սուբսիդավորում ենք ոչ միայն սերմացուն և պարարտանյութը, այլև դիզվառելիքը, որը կարևորագույն կոմպոնենտ է գյուղատնտեսական ապրանքների ինքնարժեքի մեջ: Այսուհետ դիզվառելիքը գյուղացիներին հասանելի է լինելու 350 դրամով: Դիզվառելիքի մատակարարման ընկերության ընտրություն ենք կատարել' ելնելով հետևյալ չափանիշներից. գնումների շրջանակային պայմանագրերի միջոցով մենք պարզել ենք, որ վերջին 3 ամիսների ընթացքում ամենամատչելի գնով դիզվառելիքը մեզ մատակարարել է «Ֆլեշ» ընկերությունը, և այն ունի դիզվառելիքը սպառողներին հասցնելու բացառիկ հնարավորություններ»: