Դուրյանը հանգրվանեց Պանթեոնում՝ մյուս անմահների կողքին (Տեսանյութ)

Ավելի քան չորս տասնամյակ դեգերումներից հետո բանաստեղծ Պետրոս Դուրյանի մասունքներն իրենց հանգրվանը գտան Երևանի Կոմիտասի անվան պանթեոնում՝ մեր մյուս մեծերի կողքին։

Բանաստեղծի գանգի բեկորներն ամփոփող սափորն ու Սկյուտարի հայկական գերեզմանոցում գտնվող նրա շիրիմից բերված հողն ամփոփվեցին Պանթեոնի հուշապատի մեջ։ Կատարվեց հոգեհանգստի արարողություն, ելույթ ունեցան Հայաստանի գրողների միության նախագան Լևոն Անանյանն ու Եղիշե Չարենցի անվան գրականության և արվեստի թանգարանի տնօրեն Կարապետ Վարդանյանը՝ պատմելով մասունքների անցած ճանապարհի ոդիսականը։

Արարողությանը ներկա էին ԱԺ նախագահ Սամվել Նիկոյանը, Երևանի քաղաքապետ Տարոն Մարգարյանը, մշակույթի նախարար Հասմիկ Պողոսյանն ու այլ գերատեսչությունների ներկայացուցիչներ։

Մինչև այս վերջնական հանգրվանը վաղամեռիկ բանաստեղծի մասունքները երկար ճանապարհ են անցել։ Պոլսի Սկյուտար թաղամասի հայկական գերեզմանոցում հուղարկավորված բանաստեղծի շիրիմը 1957 թ. Պոլսի պատրիարքարանի ջանքերով տեղափոխվել է գերեզմանոցի խորքը, քանի որ գտնվում էր այն տարածքում, որը Ստամբուլի քաղաքապետարանի որոշմամբ պետք է ճանապարհի վերածվեր։ Այդ ժամանակ պատրիարք Գարեգին Խաչատուրյանի կարգադրությամբ բանաստեղծի գանգի բեկորները տեղափոխվել են պատրիարքարան, ապա ավելի քան տասը տարի անց՝ հանձնվել Ամենայն Հայոց Վազգեն Ա կաթողիկոսին, ով էլ 1969-ին այդ բեկորները հանձնել է Եղիշե Չարենցի անվան գրականության և արվեստի թանգարան։ Նշենք, որ հենց այսօր Պանթեոնում հանգրվանած գանգի բեկորներին և վիրաբույժ, մարդաբան Անդրանիկ Ճաղարյանին ենք պարտական Դուրյանի այն նկարի համար, որն այսօր տեսնում ենք գրքերի էջերում։ Դուրյանը լուսանկար չի ունեցել, և 1970-ականների սկզբին Անդրանիկ Ճաղարյանի ուսումնասիրությունների շնորհիվ է վերականգնվել նրա արտաքինը։ Ուսումնասիրություններից հետո գանգի բեկորները նորից վերադարձվել են թանգարան և պահվել այնտեղ մինչև Պանթեոնում ամփոփելու մասին վերջնական որոշման կայացումը։