Իրանն ունի 4 ատոմային ռումբի համար անհրաժեշտ ուրան. Իսրայել

«Իրանն այս պահին ունի այնքան հարստացված ուրան, որքան որ անհրաժեշտ է 4 ատոմային ռումբ պատրաստելու համար»,– «Ինտերֆակս»–ի (Интерфакс) փոխանցմամբ՝ հայտարարել է իսրայելական ռազմական հետախուզության ղեկավար Ավիվ Կոհավին:

Երեկ՝ փետրվարի 1-ին, հայտնի դարձավ, որ Իրանն ավելացրել է պաշտպանության համակարգի ամրապնդմանն ուղղված բյուջետային ծախսերը 127 տոկոսով։ Միևնույն ժամանակ Իսրայելում ստեղծվել է նոր էլիտար զինվորական ստորաբաժանում՝ թշնամու թիկունքում հատուկ գործողություններ իրականացնելու համար։ Իհարկե, իսրայելական բանակի հրամանատարական կազմի ներկայացուցիչները ոչ մի կերպ չեն կապում այս նոր ստորաբաժանման ստեղծումն «իրանական խնդրի» հետ։

Իսրայելական մամուլում երեկ տարածված լուրերի համաձայն՝ նույնիսկ հայտնի է, թե երբ է սկսվելու պատերազմն Արևմուտքի և Իրանի միջև։ Ըստ այդ տեղեկությունների՝ ԱՄՆ–ը, իր դաշնակիցների աջակցությամբ, կարող է հարձակում գործել իրանական ատոմային օբյեկտների վրա 2012-ի հունիսին, երբ Պարսից ծոց կժամանեն ամերիկյան հատուկ նշանակության ուժերի ներկայացուցիչները։