Իրաքում մահապատժի կենթարկեն քրիստոնյաների հանդեպ ամենախոշոր հաշվեհարդարի մասնակիցներին

Իրաքի դատական բարձրագույն խորհուրդը մահապատժի ենթարկելու վճիռ է կայացրել 2010 թվականին Սիրիական կաթոլիկ եկեղեցու բաղդադյան տաճարում քրիստոնյաներին գերի վերցնելուն մասնակցած երեք ահաբեկիչների գործով։ Ինչպես հաղորդում է «Ռոյթերս»-ը (Reuters), մոտակա օրերս դատավճիռը կներկայացվի Իրաքի նախագահ Ջալալ Տալաբանիի հաստատմանը։

Դատական խորհրդի մամլո խոսնակի խոսքերով՝ բոլոր երեք ահաբեկիչներն էլ մեղավոր են ճանաչվել ահաբեկչության մեջ։ Դատավճիռը վերջնական է և ենթակա չէ բողոքարկման։

Հիշեցնենք, որ Բաղդադի կաթոլիկ եկեղեցու վրա հարձակումն իրականացվել էր 2010 թվականի հոկտեմբերի 31-ին։ Զինյալների խումբը ներխուժել էր Սաիդաթ ալ–Նեջաթ եկեղեցի և գերեվարել այնտեղ գտնվող շուրջ 100 մարդու։ Իրաքյան իշխանությունների հակաահաբեկչական գործողությունների հետևանքով, որոնց մասնակցել են իրաքցի և ամերիկացի զինվորականները, մահացել էր 52 մարդ, 67-ը՝ վիրավորվել։