«Չորրորդ ինքնիշխանություն». Վարչապետը շփոթել է պատճառն ու հետևանքը

Կառավարության երեկվա նիստում վարչապետ Տիգրան Սարգսյանը հայտարարել է, թե այն ընտանիքները, որոնք չեն կարողանում իրենց երեխաներին ապահովել կրթությամբ, ունենում են աղքատության խնդիր:

Մեկնաբանելով լուրը՝ «Չորրորդ ինքնիշխանություն» թերթը գրում է. «Տիգրան Սարգսյանի մտքի փայլատակումները միշտ էլ հիացրել են հայ հասարակությանը, բայց այս անգամ նա ակնհայտորեն գերազանցել է ինքն իրեն: Փաստորեն, նրա կարծիքով՝ մարդիկ աղքատ են, որովհետեւ չեն կարողանում իրենց երեխաների համար կրթություն ապահովել: Իսկ մեզ թվում էր, թե ճիշտ հակառակն է՝ մարդիկ չեն կարողանում իրենց երեխաների համար կրթություն ապահովել, որովհետեւ աղքատ են: Մի խոսքով՝ վարչապետը հերթական անգամ շփոթել է պատճառն ու հետեւանքը: Ըստ այդմ էլ գտել է աղքատության հաղթահարման բանաձեւը, որի համաձայն՝ աղքատությունը հաղթահարելու համար մարդը պիտի իր երեխաներին ապահովի կրթությամբ: Այսինքն՝ աղքատությունը կարող են հաղթահարել միայն նրանք, ովքեր աղքատ չեն, որովհետեւ կրթությունը Հայաստանում բավականին թանկ արժե:
Ի դեպ, հետաքրքիր է՝ ո՞վ է մեղավոր, որ Հայաստանի բուհերում այդպիսի բարձր գներ են սահմանվել: Հիմնական բուհերը, հիշեցնենք, պետական են, վարձավճարներն էլ պետությունն է հաստատում»: