Երևանը և Ուկրաինայի քաղաքները համագործակցության մեծ հեռանկար ունեն. Տարոն Մարգարյան

Երևանի քաղաքապետ Տարոն Մարգարյանը հանդիպել է Հայաստանի Հանրապետությունում Ուկրաինայի Հանրապետության արտակարգ և լիազոր դեսպան Իվան Կուխտայի հետ: Այդ մասին ասված է Երևանի քաղաքապետարանի կայքում զետեղված հաղորդագրությունում:

Երևանի քաղաքապետը բարձր է գնահատել հայ-ուկրաինական հարաբերությունները՝ նշելով, որ Երևանի և ուկրաինական քաղաքների միջև ձևավորված բարեկամական կապերն ընդլայնվելու մեծ հեռանկար ունեն: Քաղաքապետը ներկայացրել է մայրաքաղաքի զարգացման հիմնական ուղղությունները և ընդգծել, որ տեղական ինքնակառավարման բնագավառում համատեղ ծրագրերի իրականացումը կարող է փոխադարձ հետաքրքրություն ներկայացնել մի շարք ոլորտներում:

Դեսպանը քաղաքապետին վստահեցրել է, որ առաջարկները կներկայացնի ինչպես պետական կառավարական, այնպես էլ ուկրաինայի գործարար շրջանակներին: Քաղաքապետ Տարոն Մարգարյանը պատրաստակամություն է հայտնել աջակցել ուկրաինական կողմին'համատեղ ծրագրերի իրականացման գործում: Կողմերը քննարկել են նաև երկուստեք հետաքրքրություն ներկայացնող հարցեր: