Ահաբեկչություն Բեյրութում՝ Հիզբոլլահ-ի թաղամասում. կան զոհեր

Լիբանանի մայրաքաղաք Բեյրութի հարավային ծայրամասում հզոր պայթյուն է որոտացել: Կան վիրավորներ և զոհեր, չնայած զոհերի քանակի մասին լուրերը դեռևս հակասական են: Ըստ առկա տեղեկությունների՝ կա 2 զոհ, որոնցից մեկը 7-ամյա երեխա է: Այս լուրերը հաստատել է ոստիկանությունը: Մեկ այլ աղբյուրի տեղեկությունների համաձայն՝ զոհերի քանակը շատ ավելին է. տեղեկացնում է AFP-ն:

Զգալի վնաս է հասցվել մոտակայքում գտնվող մեքենաներին և շինություններին:

Ականապատ մեքենան պայթել էր արմատական Հիզբոլլահ շարժման հենակետ համարվող թաղամասում, ուր կան ինչպես քաղաքացիական, այնպես էլ ռազմական օբյեկտներ:

Ահաբեկչության պատասխանատվությունը դեռևս ոչ ոք չի ստանձնել, սակայն ենթադրվում է, որ դրա հետևում կանգնած են սիրիացի ապստամբների կողմնակիցները:

Նշենք, որ Հիզբոլլահ շարժման հազարավոր գրոհայիններ մարտնչում են Սիրիայում՝ նախագահ Բաշար Ասադի ուժերի կողքին: