Հայտնի է «Queen» խմբի նոր վոկալիստը

«Queen» խմբի նոր վոկալիստ է դարձել փոփ երգիչ Ադամ Լամբերթը։ «Contact Music»-ը տեղեկացնում է, որ Լամբերթը հաստատել է խմբի հետ իր համագործակցության մասին տեղեկությունը: 2012 թ. գարնանը և ամռանը նա «Queen» խմբի հետ մեկնելու է հյուրախաղերի։
Լամբերթն համատեղ աշխատանքի փորձ ունի «Queen» անդամների՝ Բրայան Մեյի և Ռոջեր Թեյլորի հետ: 2009 թ. նրանք միասին ելույթ են ունեցել «American Idol»-ի նախագծերից մեկում:

Սակայն դրանից հետո երգիչը հայտարարել էր, որ չի դառնալու «Queen»-ի անդամ: 2011 թ. նոյեմբերին տրիոն համատեղ ելույթ ունեցավ MTV European Music Awards մրցանակաբաշխության ժամանակ: Դրանից հետո դարձյալ լուրեր տարածվեցին, որ Լամբերթն, այնուամենայնիվ, կդառնա խմբի անդամ, իսկ դեկտեմբերին Թեյլորը հաստատեց, որ, իրոք, նման բանակցություններ են ընթանում:

«Միանգամայն գիտակցում եմ, որ չեմ կարող հանրության համար դառնալ նոր Ֆրեդի Մերկուրի, պարզապես լավ հնարավորություն եմ համարում ելույթ ունենալ նման խմբի կազմում», – ասել է Ադամ Լամբերթը։