Արագությունը գերազանցելու պատճառով հրաժարական է տվել

Ինչպես հայտնում է «Sky News»-ը, Մեծ Բրիտանիայի էներգետիկայի և կլիմայի փոփոխության հարցերով նախարար Քրիս Հյունը փետրվարի 3-ին պաշտոնից հեռացել է այն բանից հետո, երբ պարզվել է, որ նա ոստիկանությունում ստել է: Նա մեղադրվում է ճանապարհին արագությունը գերազանցելու մեջ, սակայն ոստիկաններին ասել է, թե ղեկին եղել է իր կինը՝ Վիկի Փրայսը:

Միջադեպը տեղի է ունեցել 2003 թվականի գարնանը, սակայն խաբեությունը բացահայտվել է 2010 թվականին, երբ Հյուն բաժանվել է կնոջից: 2011 թվականին Փրայսը «The Sunday Times»-ին պատմել է միջադեպի մասին, որից հետո դրանով հետաքրքրվել է ոստիկանությունը: «The Daily Telegraph»-ը գրում է, որ հետաքննությունը շարունակվել է ութ ամիս, որից հետո Հյունին և Փրայսին մեղադրանք է առաջադրվել: Նրանց մեղադրել են արդարադատությունը խեղաթյուրելու, այսինքն՝ քրեական հանցագործություն կատարելու մեջ, որի համար առավելագույն պատիժը ցմահ ազատազրկումն է: Ինչպես նշում է պարբերականը, Մեծ Բրիտանիայի ժամանակակից պատմության մեջ բարձրաստիճան անձի նկատմամբ նման լուրջ մեղադրանք դեռ չի առաջադրվել:

Հյուն իրեն մեղավոր չի ճանաչում և մտադիր է դատարանում արդարության հասնել։