ՄԱԿ-ի ԱԽ-ն այլևս չի պահանջում Բաշար Ասադի հրաժարականը

ՄԱԿ-ի պաշտոնական կայքում զետեղվել է կազմակերպության Անվտանգության խորհրդի՝ Սիրիայի վերաբերյալ բանաձևի նորացված տարբերակը: Բանաձևի վերջնական տեքստից հանվել են նախագահ Բաշար Ասադի հրաժարականի և Սիրիային զենքի մատակարարման դադարեցման պահանջները:

Անվտանգության խորհուրդը բանաձևի միջոցով հայտարարում է Սիրիայի ինքնիշխանության, անկախության, միասնականության և տարածքային ամբողջականության պահպանման անհրաժեշտության մասին և ընդգծում երկրում առկա քաղաքական ճգնաժամը խաղաղ ճանապահով լուծելու իր մտադրությունը։

Բանաձևում քննադատվում են «մարդու իրավունքների և հիմնարար ազատությունների՝շարունակական և լայնածավալ խախտումները, քաղաքացիական անձանց նկատմամբ ուժի կիրառումը, ցուցարարների ու լրատվամիջոցների ներկայացուցիչների ապօրինի դատավարությունները, սպանություններն ու հետապնդումները»:

Բանաձևի տեքստում հատուկ ընդգծված է, որ այն չի թույլատրում Սիրիայի նկատմամբ ՄԱԿ-ի Կանոնադրության 42-րդ հոդվածով նախատեսված միջոցների կիռառումը։ Այդ հոդվածը ենթադրում է այս կամ այն պետության շրջափակման համար անհրաժեշտ ուժի կիրառում՝ աշխարհում խաղաղության ու անվտանգության ապահովման նպատակով։

Արաբական երկրների լիգայի ծրագրին համահունչ՝ ՄԱԿ-ի ԱԽ-ի բանաձևի վերջնական տարբերակը Սիրիայի իշխանություններին կոչ է անում դադարեցնել բռնությունը, պաշտպանել ազգաբնակչությունը, ազատ արձակել ապօրինաբար մեկուսացված բոլոր բանտարկյալներին, քաղաքների փողոցներից դուրս բերել զինվորականներին, ինչպես նաև ապահովել հաղաղ ցույցերի ազատությունն ու միջազգային բոլոր լրատվամիջոցների, կազմակերպությունների ու Լիգայի ներկայացուցիչների ազատ մուտքը երկրի տարածք:

Բանաձևի հեղինակները նաև ողջունել են Ռուսաստանի առաջարկը՝ Մոսկվայում Սիրիայի ընդդիմության և իշխանության ներկայացուցիչների հանդիպում անցկացնելու վերաբերյալ: