«Մենք չենք կարող հրավիրել ձեզ Դիարբեքիր, որովհետև մարդուն իր տուն չեն հրավիրում». Օսման Պայտեմիր

Այսօր «Հայելի» ակումբի հյուրերն էին ԱԺ պատգամավոր Արագած Ախոյանն ու «Ակունք» անսամբլի ղեկավար Սարգիս Ալավերդյանը։ «Ամսի քսաներկուսին տեղի ունեցավ սուրբ Կիրակոս եկեղեցու օծման արարողությունը, այնտեղ ամենուր խոսում էին հայերեն, հայեր էին եկել բազմաթիվ երկրներից, հետաքրքիր էր, որ պատմական հուշարձաններին կային պաստառներ, որտեղ գրված էին հետևյալ բառերը՝ «Հայեր, բարով եկաք ձեր տուն»։  Հանդիպեցինք քաղաքապետին, այն, ինչ խոսվեց, բխում էր մեր շահերից, ասեմ, որ սա քաղաքական այց չէր, այլ մշակութային»,– պատմեց ԱԺ պատգամավոր Արագած Ախոյանը։ «Հաջորդ օրը մենք գնացինք Մուշ ու երբ ճանապարհին Սասունում իջանք, մեզ զանգեցին ու ասացին, որ Վանում երկրաշարժ է եղել։ Մենք հենց սկզբից գիտեինք, որ զոհերի թիվն ավելին էր, քան հայտարարվում էր, բարեբախտաբար այնտեղ ոչ մի հայ չկար։ Սակայն մենք գիտենք, որ տեղաբնիկ հայեր այնտեղ շատ կան»,– պատմեց պատգամավորը։

Հիշեցնենք, որ սա Արագած Ախոյանի երրորդ այցն էր Թուրքիա, մինչ այդ երկու անգամ նա մեկնել էր փառատոնների։ Այդ ընդունելություններն անցել են նույն տրամադրությամբ, Վանի ու Դիարբեքիրի քաղաքապետերը բոլոր այցելությունների ժամանակ մեր պատվիրակությանն ընդունել են շատ լավ, ամեն առիթով նշել են, որ այդ հողերը «հայկական են ու հրավիրելու կարիք չկա, որովհետև մարդուն իր տուն չեն հրավիրում»։

«Երկրաշարժից երկու օր առաջ հանդիպում եղավ քաղաքապետի հետ, որն այս տարի առավել լավ ընդունեց հայերին։ Ամենուր նվերների կարգով բաժանվում էին «Մի կաթիլ մեղր», «Չարաճճի մժեղ» հեքիաթները՝ հայերեն, թուրքերեն, քրդերեն լեզուներով։ Այդ գրքերից մեկի նախաբանում նշվում է, գրքերի հրատարակության համար դատարաններով են անցել, բայց ոչինչ չի խանգարել այդ նվիրական գործն ի կատար ածել»,– ասաց «Ակունք» անսամբլի գեղարվեստական ղեկավարը։