«Չորրորդ ինքնիշխանություն». Երկու առաջարկ ՀՀԿ-ին

«Լիարժեք իշխանավարելու համար միանգամայն բավարար ենք համարում 60 տոկոս ներկայությունը Ազգային ժողովում, բայց ընդդիմությունն է, որ չի կարողանում 30 կամ 40 տոկոս հավաքել» ՀՀԿ փոխնախագահ Ռազմիկ Զոհրաբյանի խոսքերն է մեջբերում «Չորրորդ ինքնիշխանություն» թերթը։

Մեկնաբանելով Զոհրաբյանի հայտարարությունը՝ թերթը գրում է. «Հասկացա՞ք: Փաստորեն՝ իշխանությունները մեղավոր չեն, որ այսօրվա խորհրդարանում համարյա 90 տոկոս ունեն: Իրենց 60 տոկոսն էլ է հերիք, իրենք ի՞նչ մեղավոր են, որ ընդդիմությունը չի կարողանում այդ 30-40 տոկոսը հավաքել, ու ստիպված՝ իրենք են «վերցնում» այդ ձայները:

Ի դեպ, եթե Ռազմիկ Զոհրաբյանը խիստ մտահոգված է իշխանությունների մանդատների ավելցուկով, կարող ենք միանգամից երկու առաջարկ ներկայացնել: Առաջին՝ թող քվոտաներ սահմանեն ընտրակեղծիքների համար և մի որոշում ընդունեն, որի համաձայն՝ ոչ մի ընտրատարածքում 10 հազար ձայնից ավել չեն կեղծելու: Այդ դեպքում հաստատ 60 տոկոս չեն ունենա: Եվ երկրորդ առաջարկը: Եթե այնուամենայնիվ որոշել են կեղծել անսահմանափակ քանակով, թող ՀՀԿ նախընտրական ցուցակի անցողիկ տեղերի 40 տոկոսը տան ընդդիմությանը: Թէ չէ հիմա մի տեսակ սիրուն բան չի ստացվում: Ոնց որ մեկը մյուսի դրամապանակը գողանա ու հետն էլ մուննաթ գա, թե ի՞նչ մարդ ես, որ մի դրամապանակ էլ չես կարողանում պահպանել»: