Հայաստանը հակադրվում է աշխարհում ընդունված բնականոն գործընթացներին

Լևոն Մութաֆյանը ֆեյսբուքյան իր էջում գրել է.

«Աշխարհի ցանկացած երկրում, ուր առկա են սոցիալական կուտակումներն ու բևեռացումները, հանրային դժգոհությունը մերժելու, քաղաքացիական անհնազանդության կոչերը մարելու, ժողովուրդ-իշխանություն կապ ձևավորելու համար ընտրում են էժանացումների գործընթացը: Սա հնարավորություն է տալիս տնտեսության մեջ արձանագրելու տեղաշարժեր, բարելավելու բիզնես միջավայրը՝ այսպիսով հասնելով կայունացման և բնակչության շահերի պաշտպանության: Հայաստանում, հակադրվելով աշխարհում ընդունված բնականոն գործընթացներին, անում են հակառակը՝ այսպիսով խթանելով արտագաղթը, սոցիալական բևեռացումները դարձնելով անհաղթահարելի:

Ինչու՞: Բանն այն է, որ մեր երկրում տնտեսության ,,փիլիսոփայությունը,, ոչ թե մշակվում է հատուկ ինստիտուտներում,կառավարության համապատասխան վերլուծական կենտրոններում, այլ անձերը՝ ունենալով շահեր և ազդեցություններ, իրենք են թելադրում ամեն ինչ: Հենց սա է վայրի կապիտալիզմը, ինչի մասին մեզ մոտ չեն կամենում բարձրաձայնել: Հայաստանը բազմաթիվ անկումներ է արձանագրել, կորցրել է ինքնատիրապետումը, վտանգված են սոցիալական և քաղաքական կայունության սկզբունքները, տիրապետող է դարձել մասնավոր շահի գերակայությունը: Ընդունենք թե չընդունենք, սա պետության քայքայման գլխավոր նախապայմանն է: Հայաստանը, որպես պետություն, որպես ինքնիշխանություն՝ քայքայվում է:

Օբյեկտիվ պատճառներին՝ մեկուսացում և շրջափակում, միավորվում են համակարգային-կառավարչական սխալները, գումարվում են իշխանության ներսում տեղի ունեցող ,,գոտեմարտերը,, ազդեցությունների համար: Ավելացնենք նաև ՀՀ նախագահի զարմանալի-տարօրինակ հանգիստ կեցվածքը, երբ նա չի կամենում, ականջալուր լինելով հանրային պահանջներին, մղվելու դեպի բարեփոխումները, կադրային զտումները, երկրում մեծ չափերի հասնող պետական թալանի կանխումները:Ելնելով նախագահի պահվածքից, կարող ենք ենթադրել, որ նախագահը պատանդ է դարձել իր իսկ ստեղծած քրեաօլիգարխիկ համակարգի հզորների ձեռքին՝ այլևս չունենալով ներազդման միջոցներ...Սա արդեն չափազանց վտանգավոր է պետության համար: Ռուսաստանի՝ Հայաստանի նկատմամբ կատարվող քայլերը, հուշում են, որ Կրեմլը մտադրվել է ամեն գնով Հայաստանը ներառել ՌԴ կազմի մեջ՝ որպես դաշնային սուբյեկտ, ինչին, հավանաբար, հայաստանյան իշխանությունները դեմ չեն, այլապես գոնե վերջին երկու ամսվա ընթացքում նրանք ոտքի կկանգնեին, կդիմեին միջազգային ատյաններ: Իսկ դիմելու համար ,,նյութեր,, շատ կան. Ադրբեջանը խախտում է սպառազինությունների հավասարակշռությունը, իսկ խախտումն իրականացվում է ԵԱՀԿ ՄԻնսկի խմբի համանախագահող երկրի կողմից...

Ի՞նչ ենք անելու և ինչպե՞ս, ու՞ր ենք գնալու...

Այս մասին պիտի լրջորեն մտածել: Իսկ մտածելու համար անհրաժեշտ է, որպեսզի երկրի նախագահը հենց հիմա հրավիրի ԱԺ արտահերթ նիստ, թեկուզ փակ ռեժիմով, պատգամավորների հետ քննարկի երկրում ստեղծված կացությունը: Անձը միայնակ իրավունք չունի լուծելու երկրի ճակատագիրը...»։