Մեզ մոտ կոալիցիան բնական կոալիցիա չէ, ձևական է. Վարդան Օսկանյան

ՀՀ նախկին ԱԳ նախարար Վարդան Օսկանյանը «168 Ժամ»-ի հետ զրույցում իշխող կոալիցիան ձևական է անվանել:

«Մեզ մոտ կոալիցիան բնական կոալիցիա չէ, ձեւական է: Դրա համար էլ գոյություն ունեցող իրավիճակի պատասխանատվությունը դրական և բացասական առումներով հիմնականում ընկնում է ՀՀԿ-ի վրա, որը խորհրդարանում ունի բացարձակ մեծամասնություն և ցանկացած հարցում կարող է միայնակ որոշում կայացնել»,-ասել է նա:

«Սիվիթաս»-ի տնօրենի խոսքերով՝ որպեսզի ԲՀԿ դառնա այնպիսի քաղաքական ուժ, որը կկարողանա խորհրդարանում իրական քաղաքական հակակշիռ ներկայացնել, կա՛մ պետք է իսկական կոալիցիա կազմի, կա՛մ կարողանա խորհրդարանում մեծամասնություն վերցնել: Իր հնարավոր անդամագրումը այդ կուսակցությանը Վարդան Օսկանյանը բացատրում է հենց այդ կայացման պոտենցիալով, որը նա տեսնում ԲՀԿ-ի մեջ:

«Եթե ես վստահ չլինեմ, որ ԲՀԿ-ն հանդգնորեն չի մտնելու քաղաքական պայքարի մեջ, ես չեմ ներգրավվի քաղաքական գործընթացների մեջ, որովհետև անիմաստ կլինի», - ընդգծել է նա:

Անդրադառնալով ԲՀԿ-ՀՀԿ հարաբերություններում լարվածությանը՝ Օսկանյանը նշել է, որ իր տպավորությունն այնպիսին է, որ ԲՀԿ-ին կարծես ասվում է՝ «եկեք շարունակենք համագործակցությունը, բայց պիտի հրաժարվեք ձեր ինքնուրույնությունից»: ԱԳ նախկին նախարարը նույն այդ լարվածությանը հետևանք է համարում նաև ԲՀԿ որոշ անդամների ձեբակալությունը և մարդկանց «արտահոսքը» կուսակցությունից: Այդ առնչությամբ նա նշում է.«Այդ իրադարձությունների մեջ ես չեմ խորացել, բայց արտաքուստ տպավորությունս այն է, որ դրանք, իրոք, քաղաքական նպատակներով են արվում»: Իսկ տարածված լուրերի վերաբերյալ, թե երկու կոալիցիոն ուժերի միջև լարվածության առաջացման հարցում իր «ներդրումն» է ունեղել նաև Ռոբերտ Քոչարյանը, Օսկանյանը կարծիք է հայտնել, որ հայերի քաղաքական մտածողության թերություններից մեկն այն է, որ քաղաքական ամեն զարգացում փորձում են նախագահների հետ կապել:

Ինչ վերաբերում է ՀՀԿ-ի կողմից հնչեցված այն մեղադրանքներին, թե ԲՀԿ-ն խախտում է ուժերի հարաբերակցութունը պահելու մասին կոալիցիոն պայմանը, Օսկանյանը նշեց. «Կարծում եմ, որ այդ դրույթը հնարավոր կլինի իրագործել այն ժամանակ, երբ այդ կուսակցությունները մեկ ցուցակով մասնակցեն ընտրություններին: Իսկ եթե միասին չեն մասնակցում, պետք չէ մեղավոր փնտրել, թե ով է խախտում: Փաստաթուղթն է մեղավոր»:

Իսկ լրագրողի այն հարցին ի պատասխան, թե արդյոք հարյուր տոկոս համամասնական ընտրակարգին անցնելու նախաձեռնությունը կարող է միավորել քաղաքական ուժերին, նա նշեց, որ կուսակցությունների հիմնական խնդիրը այժմ արդար ընտրությունների անցկացումն է:

«Եթե հնարավոր չէ մեծամասնականը վերացնել, ուրեմն այս նույն ուժերն իրենց աշխատանքը պետք է կենտրոնացնեն այնպիսի մեխանիզմներ ստեղծելու վրա, որպեսզի կարողանան համատեղ հսկել ընտրական գործընթացը և վստահ լինեն, որ այն անցնում է արդար»,- ասել է Օսկանյանը: