Շնորհավորում ենք ֆեյսբուքահայությանը

Ի՞նչ պիտի աներ մեր ազգի՝ տարբեր ոլորտներում ակտիվ հատվածը, եթե չլիներ Facebook-ը՝ բոլորիս միավորող հայտնի սոցիալական ցանցը։ Facebook-ը մտավ մեր կյանք մի քանի տարի առաջ և այնքան խորը արմատներ ձգեց, որ այսօր արդեն լուրջ մարտահրավեր է նետում իրական կյանքին։ Չնայած հայերեն տարբերակների առկայությանը՝ մեր խոսքում սովորական են դարձել like, share, attending, friend, wall ու նման բազմաթիվ բառեր, որոնց աղբյուրը հենց այդ «չարաբաստիկ» աշխարհն է՝ Facebook-ը։ Նույնիսկ Ֆեյսբուքահայաստան և ֆեյսբուքահայություն բառերն են գոյության իրավունք ստացել։ Գրեթե բոլորիս ընկերների ցանկում կան բազմաթիվ անուններ, որոնց միայն այդ կայքի շրջանակներում գիտենք, ու երևի բոլորս էլ իրական կյանքում ունենք ընկերներ, ում հանդիպելու համար հենց Facebook-ին ենք պարտական։ 

Իսկ այս ամենը կա, քանի որ 8 տարի առաջ մի հավակնոտ երիտասարդ՝ Մարկ Ցուկերբերգը, որոշեց ձեռնարկել գրեթե ֆանտաստիկ թվացող մի ծրագիր՝ ստեղծել մի կայք, ուր աշխարհի տարբեր անկյուններից մարդիկ կկարողանային կապվել իրար, շփվել, գտնել կորցրած մտերիմներին կամ ձեռք բերել նոր մտերիմներ։

Ուղիղ ութ տարի առաջ այս օրը ծնվեց Facebook սոցիալական ցանցը, որն այդ ժամանակ դեռ չափազանց անիրատեսական, անհավանական նախագիծ էր թվում, իսկ այսօր ունի 800 միլիոնից ավելի ակտիվ օգտատերեր։ Ճիշտ կազմակերպված PR-ի, կայքի հաճելի և չնյարդայնացնող ձևավորման, բազմաթիվ հետաքրքիր, մշտապես ավելացվող առաջարկների և նորամուծությունների շնորհիվ ընդամենը 8 տարում Facebook-ը կարողացավ հասանելի դառնալ և գրավել աշխարհի բնակչության 1/10-րդից էլ ավելիին։

Հայաստանում Facebook-ն սկսեց ակտիվանալ 2008 թվականից, և ցանցում արդեն գրանցված է այժմ ավելի քան 250,000 հայաստանցի օգտատեր։  

Շնորհավորում ենք մեր բոլոր հայրենակիցներին, ում կյանքում Facebook-ն ինչ-որ բան է փոխել, նրանց, ովքեր չեն պատկերացնում իրենց կյանքն առանց բարի լույս և բարի գիշեր մաղթող կարգավիճակ գրելու, նրանց, ովքեր կայքում համախոհներ են գտել և փորձել են երկրում ինչ-որ բան փոխել, նրանց, ովքեր ավելի ճանաչելի և գնահատված են դարձել, նրանց, ում գործերն ու քննությունները գրեթե տապալվել են կայքից կտրվել չկարողանալու համար, ինչպես նաև նրանց, ում համար Facebook-ն ընդամենը սովորական կայք է՝ առանց կողմնակի ազդեցությունների։ Միայն մի մաղթանք ունենք՝ ոչ մի բանից կախվածություն մի՛ ունեցեք, և թող վիրտուալ կյանքը երբեք չխանգարի իրական կյանքին սթափ նայելուն։