DJ Վակցինան՝ ընդդեմ Քաղաքապետարանի աշխատակցի

Բլոգոսֆերա 25 Հուլիս, 2013 0:15

Սոնա Դավթյանը Facebook սոցցանցի իր էջում գրել է.

«Հանրային հեռուստաընկերության «Հարցազրույց» հաղորդաշարը երեկ անդրադարձել էր տրանսպորտի սակագնի բարձրացմանը: Մինչ հաղորդումը սկսելը մտածում էի, որ միգուցե բողոքող կողմից հրավիրած կլինի այնպիսի մի ակտիվիստի, ով կկարողանար եթե գոնե ոչ փաստերով, ապա իր հռետորաբանության կամ տեղեկացված լինելով հեռուստադիտողներին հակառակը համոզեր: Բայց երբ տեսա, որ Հ1-ը հրավիրել է դիջեյ Վակցինային, նախ զարմացա, ապա զայրացա: Եթե իրոք հանրայինը ցանկություն ուներ հետաքրքիր, ոլորտին առնչվող բանավեճ կազմակերպել, ոչ թե սիմվոլիկ ինչ-որ բան, ապա կարող էր հրավիրել մեկ ուրիշի` կոնկրետ Իրազեկ և պաշտպանված սպառող ՀԿ-ի ղեկավար Բաբկեն Պիպոյանին, ով միակ մարդն է առայժմ, որ կատարել է վերլուծություն և հերքել քաղաքապետարանի փաստարկները:
Ինչևէ, հարցազրույցի ընթացքում դիջեյ Վակցինան հիմնականում մեկ փաստարկ էր առաջ քաշում` ժողովրդի աշխատավարձը ցածր է, և նա ի վիճակի չէ վճարել 150 դրամ: սա իհարկե ճիշտ և հիմնավոր փաստարկ է, բայց կարող էին հնչեցվել նաև այլ հայտնի փաստեր, որոնք այժմ ես կհրապարակեմ` այսպես պատասխանելով Ալբերտ Գևորգյանի երեկվա հայտարարություններին:

Նախ` պրն Գևորգյան, որպես իշխանության ներկայացուցիչ «փաստերով» էիք խոսում, բայց ասված փաստերին հակադարձել է Բաբկեն Պիպոյանն իր հայտարարությամբ: Քաղաքապետարանը բավարարել է միայն դա աբսուրդ որակելով: Եթե էդ մակարդակով է պատասխան հնչեցվում, ուրեմն աբսուրդը միայն ձեր հրապարակումն է:

Երկրորդ` խոսում և հավաստիացնում էիք անընդհատ քաղաքակիրթ երթևեկության մասին, ասում` կանգնած ուղևոր չի լինելու: Թույլ տվեք ձեզ հիշեցնել հետևյալը` քաղաքակիրթ երթևեկություն հասկացությունը և տրասպորտին առնչվող մի շարք այլ հասկացություններ որպես օրենսդրական ձևակերպում վաղուց են ամրագրվել մեր օրենքում, հետևաբար դրա մասին պետք է ոչ թե հիմա խոսել կամ խոստանալ, այլ դա պետք է արվեր նաև 100 դրամ սակագնի դեպքում, որը չի արվել և ցավոք 150-ի դեպքում եթե լինի, էչի արվելու:

Երրորդ` մի քանի տարի առաջ` 50 դրամը 100-ի վերածվելուց հետո փորձ արվեց ոստիկանների օգնությամբ թույլ չտալ վարորդներին կանգնած ուղևոր տեղափոխել: Դա գործեց մի քանի օր և վերջ… Վարորդները բողոքեցին` պլանի փողը չի դզվում և վերջ: Դարձյալ շախմատի ձիու նման մարդիկ սկսեցին երթևեկել: Առայսօր ոչ մի դրական քայլ, բարեփոխում չի արվել տրանսպորտի ոլորտում, բացի ագահ, թալանչի ու կիսագրագետ գծատերերին հարստացնելուց:

Չորրորդ` ինչու պիտի քաղաքացին ձեզ հավատա, որն է երաշխիքը, որ դուք, որպես պաշտոնյա չեք դրժի ձեր խոստումը: Եթե քաղաքապետը մի քանի ամիս առաջ հայտարարում էր` տրանսպորտի գինը չի թանկանա, բայց եղավ հակառակը: Եթե քաղաքի ղեկավարը կամ Տարոն Մարգարյանի խոսքերով ասած` «երևանցու դարդով ապրող մարդը» սուտ է խոսում` նայելով ժողովրդի աչքերի մեջ, ինչու պետք է դուք ձեր խոստումը պահեք:

Հինգերորդ` ի պատասխան Վակցինայի հայտարարությանը, թե պետք է բարձրացնել քաղաքացիների աշխատավարձը, ասում էիք` քաղաքապետարանը դրանով չի զբաղվում: Չարաչար սխալվում եք: Քաղաքապետարանի գործառույթը մենակ ծաղիկ տնկելը, ջրելը չի, նաև Երևանցու սոցիալ-տնտեսական հարցերի լուծումն է: Սա էլ վառ ապացույցը` քաղաքապետարանի կայքից. «Սոցիալական ապահովության բնագավառում Երևանի քաղաքապետարանի ռազմավարությունն ուղղված է քաղաքացիների սոցիալական երաշխիքների պաշտպանությանն ու իրականացմանը, պետական սոցիալական ծրագրերի իրականացմամբ՝ սոցիալական ռիսկերի արդյունավետ կառավարմանը և դրանց նվազեցմանը։ Ոլորտի հիմնական խնդիրներն ուղղակիորեն առնչվում և համընկնում են աղքատության հաղթահարման ծրագրի գերակայությունների, ինչպես նաև սոցիալական պաշտպանության համակարգի զարգացման և աղքատության հաղթահարման գործում դրա մասնակցության և արդյունավետության բարձրացմանը»:

Այնպես որ պրն Գևորգյան, ձեր էդ լափշաները կտանեք ու կկախեք քաղաքապետարանի գծատերերի ու ՀՀԿ-ի ականջներին: Ի դեպ, դուք ասում եք` մտածելու եք վարորդների աշխատավարձի բարձրացման մասին, բայց ՀՀԿ փոխնախագահը հայտարարել է քիչ առաջ. «Վարորդները Հայաստանում մի քիչ էլ ավելին են ստանում, հետևաբար նրանց աշխատավարձերը չպետք է ավելանան»: Հիմա այսքանից հետո ձեզ հավատանք, թե Գալուստին»: