Բրիտանական «Reuters» լրատվական գործակալության աշխատակիցները գործադուլ են հայտարարել

Բրիտանական «Reuters» լրատվական գործակալության աշխատակիցները վերջին 25 տարիների ընթացքում առաջին անգամ գործադուլ են հայտարարել աշխատավարձերը չվճարելու պատճառով։ Գործադուլն անցկացվելու է փետրվարի 9–ից մինչև 10–ը։ 

«Reuters»–ի տնօրինությունը մերժել է աշխատավարձերը 1.75%-ով բարձրացնելու աշխատողների առաջարկը, որին հետևել է աշխատողների գործադուլ անցկացնելու որոշումը։ Բրիտանական գործակալության աշխատակիցների 83%–ը համաձայնել է մասնակցել գործադուլին։ 

Գործակալության լրատվական բաժնի խմբագիր Սթիվեն Ադլերը հայտարարել է, որ անհրաժեշտ միջոցներ են ձեռնարկում աշխատողների դժգոհությունը մեղմելու ուղղությամբ, սակայն «Reuters» լրատվական գործակալության նորությունների բաժնում գործադուլ անցկացնելու վերաբերյալ տեղեկություններ չեն հաղորդվում։ 

«Reuters» լրատվական գործակալությունը հիմնադրվել է Լոնդոնում 1851 թվականին։ 2008-ին «Reuters»–ի վերահսկողությունն անցել է «Thompson» կորպորացիային։ Ներկա պահին, լրատվական գործակալությունն աշխարհի 100 երկրներում ստորաբաժանումներ ունի, որոնցում աշխատում է 55 հազ. մարդ, հաղորդում է «Газета.ru»–ն։