Իսրայելական վերլուծաբանները կանխատեսել են Ասադի ճակատագիրը

Չնայած այն հանգամանքին, որ Սիրիայում քաղաքացիական պատերազմի մասշտաբները և ինտենսիվությունը գնալով ավելանում է, իսրայելական վերլուծաբանները և անվտանգության ուժերը չեն կարծում, որ նախագահ Բաշար Ասադն իր օրերը կավարտի, ինչպես Լիբիայի նախկին առաջնորդ Մուամար Կադաֆին։ Ըստ նրանց կանխատեսումների` այժմ Սիրիայի նախագահը մեկ ուրիշ երկրում քաղաքական ապաստան է փնտրում, որպեսզի իշխանությունը հանձնելուց հետո անմիջապես հեռանա Սիրիայից։ 

Ըստ նրանց՝ Ասադի ճամբարից ապստամբների կողմն է անցել Սիրիայի խորհրդարանի պատգամավորը, որը երկրի ամենամեծ ռազմական խմբավորումներից մեկի ղեկավարն է և իր ձեռքի տակ ունի մի քանի հարյուր սպաներ ու զինվորներ։

«Երբ Սիրիայում սկսվեցին ապստամբների և կառավարական ուժերի միջև բախումները, այդ ժամանակ երկիրը ցնցումների մեջ էր, իսկ հիմա երկիրն Ասադին ուղղակի ասում է՝ «Որոշի՛ր, թե ինչպես ես ցանկանում ավարտին հասցնել գործը»։ «Սա քաղաքացիական պատերազմ է, որը սկսվել է երկրի ծայրագավառներից և հասել մինչև Դամասկոս։ Եվ դա շատ լուրջ է», - ասել է իսրայելական անվտանգության ուժերի բարձրաստիճան պաշտոնյան։

Դեռեւս 2011–ի նոյեմբերին Թուրքիայի վարչապետ Ռեջեփ Էրդողանն առաջինն էր, որ կոչ արեց Ասադին թողնել և հեռանալ իշխանությունից՝ ավելացնելով, որ եթե Սիրիայի նախագահը շարունակի պայքարն իշխանության պահպանման համար ուրեմն նրան սպասվում է այն բռնապետերի ճակատագիրը՝ ինչպիսիք էին Հիտլերը, Մուսոլինին, Չաուշեվսկին և Կադաֆին, հաղորդում է Росбалт–ը։