Ինչո՞ւ է Աշոտյանը որոշել զբաղվել աստվածուհու բրոնզե արձանով

Կրթության և գիտության նախարար Արմեն Աշոտյանը Facebook սոցիալական ցանցի իր էջում զետեղել է մի հաղորդագրություն, որում առաջարկում է դիմել ՀՀ-ում Մեծ Բրիտանիայի նորանշանակ դեսպաններին՝ պահանջելով Հայաստան վերադարձնել Բրիտանական թանգարանում պահվող Անահիտ աստվածուհու հանրահայտ արձանի բեկորները: Ստորև ներկայացնում ենք հաղորդագրությունն ամբողջությամբ՝ առանց խմբագրման.

«ՖԲ հարգելի ընկերներ: Ինչպես գիտեք, Մեծ Բրիըանիան Հայաստանում միանգամից երկու դեսպան է նշանակել: Առաջարկում եմ, որպեսզի բոլորս միանանք, մի ընդհանուր գրությամբ համապատասխան ստորագրություններով դիմենք ՀՀ-ում ՄԲ դեսպանատուն, պահանջելով իրենցից Հայաստանին վերադարձնել Բրիտանական թանգարանում պահվող Անահիտ աստվածուհու հանրահայտ արձանի բեկորները' գլուխն ու ձեռքերը: Մշակությային արշեքների'Բրիտանիայից հայրենիք վերադարձման փորձ արդեն կա, մասնավորապեց, Եգիպտոսն է հաջողել մի քանի հարցում: Ինչ կասեք?»։

Հիշեցնենք, որ Անահիտի բրոնզե արձանի բեկորները՝ գլուխն ու ձեռքը, հայտնաբերվել են 1872-ին՝ Թուրքիայի հյուսիս-արևելյան գտնվող Սադակ բնակավայրի մերձակայքում: Իտալացի Ալեսանդրո Կաստելանին դրանք Ստամբուլով տեղափոխել է Իտալիա, ապա վաճառել Բրիտանական թանգարանին:

Իսկ թե ինչու է Աշոտյանը որոշել կրթության և գիտության տասնյակ խնդիրները թողած՝ զբաղվել մշակութային հարցերով, անհասկանալի է: Հանրապետական նախարարի այդ քայլը, հավանաբար, պետք է դիտարկել առաջիկա խորհրդարանական ընտրությունների քարոզարշավի համատեքստում: