Իսրայելի ռազմաօդային ուժերի նոր ղեկավարի կարծիքն Իրանին հարվածելու վերաբերյալ

Իսրայելական բանակը ռազմաօդային ուժերի նոր հրամանատար ունի. Ամիր Էշելի նշանակումն այդ պաշտոնին կիրակի օրը հաստատել է պաշտպաության նախարար Էհուդ Բարաքը:

Իսրայելական մամուլը միանգամից քննարկման առարկա է դարձրել Էշելի դիրքորոշումն ու արտահայտած տեսակետներն Իրանի ու Սիրայի խնդիրների վերաբերյալ:

Իսրայելում արդեն կարծիքներ են հնչում, որ հենց Էշելի վրա կընկնի իրանական միջուկային օբյեկտների ուղղությամբ իսրայելական ռազմաօդային ուժերի հնարավոր հարվածների պատասխանատվությունը:

Հատկանշական է, որ Էշելը նախկինում երբեք չի անդրադարձել Իրանի խնդրին, և միայն նշանակումից երկու շաբաթ առաջ իր մտահոգությունն է հայտնել առ այն, որ միջուկային Իրանը կարող է սահմանափակել Իսրայելի ռազմական գործողություններն ընդդեմ ՀԱՄԱՍ-ի և «Հըզբոլլահ»-ի:

Անդրադառնալով Սիրիայի խնդրին՝ Էշելը հայտարարել է, որ եթե Բաշար Ասադի ռեժիմը պարտվի, ապա «քիմիական ու կենսաբանական զենքի հսկայական քանակներ կհայտնվեն «Հըզբոլլահ»-ի ձեռքում»:

«Ցանկացած ռազմական սցենարի դեպքում՝ լինի դա սիրիական ռեժիմի անկումը կամ Իրանի ուղղությամբ Իսրայելի հարվածը, իսրայելական ռազմաօդային ուժերի կազմում գտնվող ինքնաթիռները կբախվեն սիրիական ու լիբանանյան օդային տարածքներում գործողությունների ազատության սահմանափակման հետ»,-ասել է նա: