Ասադի ճակատագիրը Պուտինի ձեռքում է. Haaretz

Սիրիայի իրավիճակի վրա ՄԱԿ–ի ժողովրդավարական «մանյովրերը» չեն ազդի այնքան ժամանակ քանի դեռ նախագահ Բաշար Ասադն աջակցություն է ստանում Ռուսաստանից, գրում է իսրայելական Haaretz–ը՝ մեկնաբանելով շաբաթ օրը ՄԱԿ–ի ԱԽ–ում Սիրիայի դեմ նոր պատժամիջոցներ կիրառելու բանաձևի քվեարկության ժամանակ Ռուսաստանի ու Չինաստանի կողմից վետո կիրառելու որոշումը։

Արաբական հեռուստաալիքները ողողվել են Սիրիայում սպանված ցուցարարների լուսանկարներով։ Սիրիական իրավապաշտպանները պնդում են, որ մարդիկ չեն կարողանում նույնիսկ հողին հանձնել դիակները՝ հրետանային ռմբակոծությունների պատճառով։

Միևնույն ժամանակ, Ռուսաստանի արտգործնախարար Սերգեյ Լավրովը շարունակում է հայտարարել, որ Ռուսաստանը դեմ է Սիրիայի հարցով այնպիսի լուծմանը, որն իր մեջ պարունակում է արտաքին ուժերի միջամտություն, մասնավորապես՝ միջազգային պատժամիջոցներ, նախագահ Բաշար Ասադի հրաժարականի պահանջ և այդ երկրին զենքի վաճառքի արգելք։

Լավրովը նշում է, որ Ռուսաստանը ցանկանում է տեսնել ոչ թե ամերիկյան, այլ սիրիական ձևով խնդրի լուծում։ Այնպես որ, եթե կա որևէ մեկը, որ որոշում է, թե երբ և ինչու Ասադը պետք է հեռանա իշխանութունից, ապա դա Վլադիմիր Պուտինն է, այլ ոչ՝ Բարաք Օբաման, նշում է հոդվածագիր Զվի Բարելը։