Բոբ Մարլին այսօր կդառնար 77 տարեկան

1945 թ. փետրվարի 6-ին Ջամայկայի Պերիշ քաղաքում ծնվել է աշխարհահռչակ երաժիշտ, երգիչ-երգահան Բոբ Մարլին (Ռոբերտ Նեստա Մարլի)։ Նա ռեգգիի ամենահայտնի և սիրված կատարողներից է, ով նաև աշխարհին հայտնի դարձրեց Ջամայկայի երաժշտությունն ու Ռաստաֆարի կրոնական շարժումը։

Բոբ Մարլիի՝ երաժիշտ դառնալու հարցում մեծ դեր է կատարել ռադիոն։ 60-ականներին նա իր մոր հետ տեղափոխվում է Քինգսթոն, ուր հայտնվում է բոլորովին նոր շրջապատում, ընկերանում աղքատ ընտանիքներից դուրս եկած հասակակիցների հետ։ Պատանիները հիմնականում ռադիո էին լսում, որն էլ պատճառ դարձավ, որ Մարլին ծանոթանա ռոք´ն´ռոլին։ Այտ տարիներին նա թողնում է դպրոցն ու սկսում աշխատել, իսկ ազատ ժամանակը տրամադրում է երգելուն։ Իսկ ահա 1963 թ. Բոբ Մարլին հավաքում էր «The Wailers» խումբը։

Խումբն արագ հայտնի է դառնում և շուտով ձայնագրում իր առաջին հիթերը։ Քիչ ժամանակ անց խումբը լքում են Մարլիի երկու ընկերները, և նա դառնում է խմբի վոկալիստը։ 1966-ին նա ամուսնանում է և տեղափոխվում ԱՄՆ, շուտով վերակենդանացնում է «The Wailers»-ը և դառնում վերելքի շրջանում գտնվող ռաստամանների «ձայնը»։ Քանի որ նա դեռ հայտնի չէր Ջամայկայի սահմաններից դուրս, չի կարողանում պայմանագիր կնքել ձայնագրման ստոիդիաների հետ, մինչև նրա կյանքում հայտնվում է «Island Records»-ը, որն այդ ժամանակ հետաքրքրված էր Ջամայկայի երաժշտությամբ։ 1973 թ. այդ ստուդիայում Մարլիի խումբը ձայնագրում է իր «Catch a Fire» ալբոմը, որը ջերմ ընդունելության է արժանանում և Մարլիին բերում համաշխարհային ճանաչում։ Ալբոմի երգերը դառնում են ռասիզմի դեմ պայքարի խորհրդանիշներ։ 1975-ին խումբը թողարկում է «Natty Dread» ալբոմը, որում ընդգրկված էր նաև այսօր Մարլիի թերևս ամենաճանաչված երգը՝ «No Woman, No Cry»-ը։ Ալբոմի աննախադեպ հաջողությունը պատճառ է դառնում, որ շուտով թողարկվի նոր ալբոմ՝ «Rastaman Vibration»։

Արդյունքում Մարլիի խումբը «Rollig Stones ամսագրի հարցմամբ ճանաչվում է 1976 թ. լավագույն խումբ։ Խումբը շրջագայում է աշխարհով մեկ, սակայն նրա ուշադրության կենտրոնում են գտնվում Երրորդ աշխարհի, հատկապես՝ Աֆրիկայի երկրները։ 1978-ին Բոբ Մարլին արժանանում է ՄԱԿ-ի կողմից ստեղծված խաղաղության մեդալին։ 

1980-ին Բոբ Մարլիի առողջությունն սկսում է վատանալ։ Դրա պատճառ է դառնում ֆուտբոլ խաղալիս ստացած ոտքի մատի վնասվածքը։ Ֆուտբոլիստի մոտ հայտնաբերում են չարորակ ուռուցք, և բուժման բոլոր փորձերը ձախողվում են։

Զգալով մոտալուտ մահը՝ երգիչը ցանկություն է հայտնում վերադառնալու հայրենիք, սակայն չի հասցնում, քանի որ մահանում է 1981 թ. մայիսի 11-ին Մայամիի հիվանդանոցում։ Բոբ Մարլին ընդամենը 36 տարեկան էր։ 

Մարլիի մահը շատերին է ցնցում։ Նրա թաղման օրը հայտարարվում է ազգային սգո օր։ Ջամայկայի մեծագույն երաժշտին հուղարկավորում են դամբարանում։

Բոբ Մարլին եվրոպական ծագմամբ հոր և ջամայկացի մոր որդին, դարձել է Ջամայկայի խորհրդանիշերից մեկը։ Հասնելով մեծ նվաճումների, ձեռք բերելով միջազգային ճանաչում, ստեղծելով երաժշտական ուղղություն, որը դարձել է ռասիզմի դեմ պայքարի և հավասարության խորհրդանիշ, նա երբեք չի մոռացել իր հայրենիքի մասին։ Նրա երաժշտության վրա մեծ ազդեցություն են թողել իր կրոնական հայացքներն ու Ջամայկայի սոցիալական խնդիրները։

Մահվանից ավելի քան 30 տարի անց էլ մարդիկ հիշում և լսում են մեծ երաժշտին։ Շնորհավորում ենք Բոբ Մարլիի երկրպագուներին և առաջարկում ևս մեկ անգամ լսել նրա հրաշալի երգերից մեկը։