«Հայկական ժամանակ». Զինդատախազը դեռ հիվանդանոցում է

ՀՀ զինդատախազ Գևորգ Կոստանյանը, որ փետրվարի 3-ի երեկոյան ինքնազգացման կտրուկ վատացման պատճառով տեղափոխվել էր «Նաիրի» բժշկական կենտրոն, շարունակում է գտնվել այնտեղ և որոշ ժամանակ կմնա բժիշկների հսկողության տակ, գրում է «Հայկական ժամանակ»-ը։

Զինդատախազի առողջական վիճակի վերաբերյալ թերթի թղթակիցը երեկ փորձել է պարզաբանումներ ստանալ «Նաիրի» բ/կ փոխտնօրեն Սիրանուշ Մարտիրոսյանից: Լսելով հարցը՝ նա անջատել է հեռախոսը: Առողջապահության նախարարի մամուլի խոսնակ Շուշան Հունանյանը նույն խնդրի վերաբերյալ ասել է, որ Գևորգ Կոստանյանի մոտ ճնշման տատանումներ են եղել, բայց այժմ նրա վիճակը լավ է: Հունանյանը նաև ասել է, որ ՀՀ զինդատախազը դեռ կշարունակի մնալ բուժկենտրոնում: Թե որքան՝ չգիտեր: Մեր թղթակիցը փորձել Է զրուցել նաև Գևորգ Կոստանյանի եղբոր՝ Կարեն Կոստանյանի հետ: Վերջինս ԱՆ ամենամեծ՝ առողջապահական ծրագրերի և որակի կառավարման վարչության պետն Է: Կարեն Կոստանյանի հետ նույնպես ոչ մի կերպ չի հաջողվել կապվել: Նշենք, սակայն, որ ըստ որոշ մասնագետների՝ «ճնշման տատանում» ախտորոշմամբ հիվանդանոցում այսքան երկար չէին պահի, և պետք է որ ամեն ինչ շատ ավելի լուրջ լինի: