«Չորրորդ ինքնիշխանություն». Հայկ Գևորգյանը հայց կներկայացնի գլխավոր դատախազություն

Երեկ «Նուբարաշեն» քրեակատարողական հիմնարկից Ազատ արձակվեց «Հայկական ժամանակ» օրաթերթի լրագրող Հայկ Գեւորգյանը, որը անազատության մեջ էր դեռևս ուրբաթ օրվանից։ Լրագրողի նկատմամբ ընտրված խափանման միջոցը փոխելու և նրան կալանքից ազատելու որոշում է կայացրել քրեական գործի նկատմամբ հսկողություն իրականացնող Երևան քաղաքի դատախազության դատախազ Սեփոյանը։ Երեկ դատախազի որոշման պատճենը ուղարկվել է «Նուբարաշեն» քրեակատարողական հիմնարկի պետին, եւ հենց կալանավայրից էլ Գեւորգյանը ազատ է արձակվել։

Հայկ Գևորգյանը պատրաստվում է դիմել Գլխավոր դատախազություն՝ պահանջով, որ գործ հարուցվի դատարանին իր մասին կեղծ տեղեկություններ տրամադրած անձանց դեմ: Հայկի փաստաբան Վահե Գրիգորյանի փոխանցմամբ՝ հենց այդ կեղծ տեղեկությունների հիման վրա է նախաքննական մարմինը «դատարանից կալանքի որոշում պոկել». «Մասնավորապես, որ նա թաքնվել է քննությունից, որ, ստանալով նախաքննության մարմնի ծանուցագրերը, չի ներկայացել նախաքննության մարմնին: Դեռ պիտի պարզվի, թե ինչ ծանուցագրերի մասին է խոսքը և արդյո՞ք դրանք օրենքի համապատասխան էին կազմված»,- «Ազատություն» ռադիոկայանին ասել է Վահե Գրիգորյանը: Բայց սա դեռ ամենը չէ. այս երեք օրերի ընթացքում խախտվել է նաև Հայկ Գևորգյանի անմեղության կանխավարկածը՝ հաշվի առնելով ոստիկանության տարածած հայտնի տեսանյութը: Ըստ այդմ՝ հայց կներկայացվի նաեւ այդ ծառայության դեմ, գրում է «Չորրորդ ինքնիշխանություն»-ը։