Լյուդմիլա Սարգսյանը պարզաբանում է Պուտինին սատարելու մասին հայտարարությունը

ՍԴՀԿ-ի՝ Պուտինին ընտրելու կոչով բաց նամակն, անշուշտ, շատերին զարմացրեց և անակնկալի բերեց։ Քննարկումների առիթ դարձավ ոչ միայն կոչը, այլև դրա աղբյուրը, քանի որ ի սկզբանե պարզ չէր՝ ո՞ր ՍԴՀԿ-ն է հայտարարության տարածողը։ Լուրեր.com-ի հետ զրույցում Լյուդմիլա Սարգսյանը հաստատեց, որ հենց իրենք են կոչի հեղինակը։

Երբ խնդրեցինք պարզաբանել, թե ինչո՞ւ է ՍԴՀԿ-ն նման որոշում կայացրել, Լյուդմիլա Սարգսյանն ասաց. «Ելնելով մեր գեոպոլիտիկ շահերից, եթե կարճ ասեմ»։ Սակայն ի վերջո որոշեց ավելի մանրամասն բացատրել իրենց որոշման շարժառիթները. «Եթե մի փոքր երկարացնեմ, ուրեմն մեր կուսակցությունը մշտապես բարեկամ է համարել Ռուսաստանին, և էսօր լավ տեսանելի է, թե արտաքին ուժերն ինչպես են փորձում ջլատել և թուլացնել Ռուսաստանը։ Բոլորս մեզ պիտի հարց տանք՝ եթե Ռուսաստանը թուլանում է, ապա ո՞վ է ուժեղանում Կովկասում։ Եվ ելնելով նաև էդ շահերից, թե ինչ կկատարվի արդեն պարսկական հատվածում՝ Հայաստանի տարածքն օգտագործելով, մենք հասկանում ենք, որ մեզ պետք է ուժեղ Ռուսաստան, և մեզ համար նախընտրելի թեկնածուն Վլադիմիր Պուտինն է, որն իրոք ուժեղ ձեռք է։ Միգուցե շատերին զարմացնի դա և շատերը նրան համարեն ոչ ժողովրդավար, բայց ես ողջունում եմ ժողովրդավարական պրոցեսներն էդ երկրում, որն ավելի ժողովրդավար Ռուսաստան կձևավորի, և դրա արդյունքում էլ ես կարծում եմ, որ ամեն դեպքում Վալդիմիր Պուտինը կընտրվի, և Ռուսաստանն արտաքին ուժերի ազդեցությամբ չի մասնատվի, չի ջլատվի, և ամերիկյան ներկայությունը Հայաստանում այսօր մենք կբացառենք, որը մեզ համար հղի է շատ վտանգներով, հատկապես հաշվի առնելով, թե առաջիկա ամիսներին ինչ զարգացումներ կարող են տեղի ունենալ Իրանի նկատմամբ Ամերիկայի տրամադրություններում»։

Տիկին Լյուդմիլան ասաց, որ այս և բազմաթիվ այլ պատճառներ հաշվի առնելով է որոշվել, որ «նման բաց նամակով, այո, պիտի դիմեինք Ռուսաստանի հայությանն ու կոչ անեինք ընտրել Վլադիմիր Պուտինին։ Հիմա էդ կոչն ինչքանով կաշխատի՝ դա մի այլ հարց է, բայց դա մեր կուսակցության դիրքորոշումն է»։

Հարցին, թե Հայ ազգային կոնգրեսում կիսո՞ւմ են իրենց կուսակցության այս տեսակետը, տիկին Սարգսյանն ասաց.«Կոնգրեսի հետ այս հայտարարությունը բացարձակ կապ չունի։ Եթե դուք հետևել եք, մենք մշտապես հանդես ենք գալիս մեր կուսակցության անունից։ Սա մեր դիրքորոշումն է»։