25 եգիպտացի` 1 իսրայելցու դիմաց. Իսրայելի եւ Եգիպտոսի իշխանությունները փոխանակում են կատարել

Իսրայելի իշխանությունները Եգիպտոսի' բանտարկության մեջ գտնվող 25 քաղաքացիների ազատ են արձակել' փրկագնելով լրտեսության համար ձերբակալված մեկ իսրայելցու: Փոխանակման մասին պայմանավորվածությունը ձեռք էր բերվել այս շաբաթ Կահիրեում տեղի ունեցած գաղտնի բանակցությունների ընթացքում, որին մասնակցել են երկու պետությունների բարձրաստիճան մի շարք զինվորականներ:

Իսրայելական «Նայլ-ԹիՎի»-ի հաղորդմամբ' 25 եգիպացիներն արդեն դուրս են բերվել քրեակատարողական հիմնարկներից ու տեղափոխվել են Եգիպտոսի հետ սահմանի մոտ գտնվող Էյլատ քաղաք:

Երեւանի ժամանակով 14:00-ի շրջանում նույն հատվածում սահմանամերձ գոտի է տեղափոխվել նաեւ իսրայելցի լրտես 27-ամյա Իլան Գրապելը:

Նշենք, որ Իլան Գրապելը Եգիպտոսում ձերբակալվել էր այս տարվա հունիսին' մեղադրանքով, որ Թահրիր հրապարակում մասնակցել է զանգվածային ցույցերին, որոնց ընթացքում աչքի է ընկել տարօրինակ պահվածքով: Միաժամանակ Եգիպտոսի հատուկ ծառայությունների ներկայացուցիչները բացահայտել են, որ Իլան Գրապելը, բացի Իսրայելի քաղաքացիությունը հաստատող անձնագրից, ունի նաեւ ԱՄՆ-ի անձնագիր: