Սիրիային ռազմական հարված հասցնելը մարտահրավեր է ՄԱԿ կանոնադրությանը և միջազգային իրավունքին. ՌԴ ԱԳՆ

Սիրիային ռազմական հարված հասցնելու ծրագրերը բացահայտ մարտահրավեր են ՄԱԿ–ի կանոնադրության հիմնական դրույթներին, ընդհանուր առմամբ` նաև միջազգային իրավունքին։ Այս մասին օգոստոսի 28-ին հայտարարել է ՌԴ ԱԳ փոխնախարար Գենադի Գատիլովը Հաագայում ՄԱԿ–ի գլխավոր քարտուղար Պան Գի Մունի հետ հանդիպման ժամանակ։ Գրում է «Ռիա Նովոստի»–ն։

«Գատիլովն ընդգծել է, որ Սիրիային ռազմական հարված հասցնելու մասին որոշ պետությունների կողմից հնչեցված ծրագրերը բացահայտ մարտահրավեր են ՄԱԿ–ի կանոնադրության հիմնական դրույթներին և միջազգային իրավունքի այլ նորմերին։ Այս փուլում անհրաժեշտ է առավելագույնս կիրառել քաղաքական–դիվանագիտական միջոցներ՝ նախևառաջ թույլ տալով ՄԱԿ–ի փորձագետներին, որոնք ներկա պահին իրականացնում են Սիրիայում քիմիական զենքի կիրառման հնարավոր դեպքերի հետազոտությունը, ավարտել իրենց առաքելությունը և զեկուցել ՄԱԿ ԱԽ–ին կատարված աշխատանքի մասին»,–ասված է ՌԴ ԱԳՆ հայտարարության մեջ։