«Հայկական ժամանակ». Զինդատախազը վերակենդանացման բաժանմունքում է

ՀՀ զինվորական դատախազ Գևորգ Կոստանյանը շարունակում է գտնվել Երևանի «Նաիրի» բժշկական կենտրոնում: Ավելին, նա վերակենդանացման բաժանմունքում է: Երեկ արդեն 5-րդ օրն էր, ինչ զինդատախազը տեղափոխվել է հիվանդանոց: Այս ընթացքում պարբերաբար հայտարարվել է, որ ճնշման հետ կապված խնդիրներ է ունեցել, բայց այժմ արդեն լավ է: Թերթի թղթակիցը, սակայն, երեկ այցելել է «Նաիրի» բժշկական կենտրոն և տեղեկացել, որ ՀՀ զինդատախազը գտնվում է վերակենդանացման բաժանմունքում: Թղթակցին հաջողվել է մի քանի վայրկյան տեսնել զինդատախազին, որն ուղիղ ու անշարժ պառկած է եղել մահճակալին: Նրա աչքերը բաց են եղել, և թղթակցի տպավորությամբ՝ նա հետաքրքրությամբ հետևում էր դռան ճեղքից այնկողմ տեղի ունեցող անցուդարձին:

«Նաիրի» բժշկական կենտրոնի փոխտնօրեն Սիրանուշ Մարտիրոսյանը ներկայացրել Է Գևորգ Կոստանյանի առողջական վիճակի հետ կապված որոշ մանրամասներ: Նա չի համաձայնել, որ իրեն ձայնագրեն, բայց ասել է, որ ՀՀ զինդատախազի մոտ ախտորոշվել է հիպերտոնիկ կրիզ: Դա, ըստ նրա, նշանակում է ճնշման բարձրացում: Սիրանուշ Մարտիրոսյանը վստահեցրել է, որ այդուհանդերձ չի հասել նախաինսուլտային վիճակի: Գևորգ Կոստանյանի վիճակն, ըստ նրա, կայուն է, ճնշումը կարգավորվել է, ընդ որում հենց բուժկենտրոն տեղափոխվելու օրվանից: Իսկ հարցին՝ ինչո՞ւ է վերակենդանացման բաժանմունքում, Միրանուշ Մարտիրոսյանը պատասխանել է, որ դա ընդամենը նրա հանգիստն ապահովելու համար է, որպեսզի տեսակցողները շատ չանհանգստացնեն: Նաև հաստատել է, որ Գևորգ Կոստանյանը պարբերաբար կաթիլային՝ երակային ներարկումներ է ստանում:

«Վաղը կամ ամենաուշը մյուս օրը նա կտեղափոխվի հիվանդասենյակ»,- ասել է Մարտիրոսյանը: Թերթի թղթակիցը երեկ զրուցել է նաև Սրտաբանության գիտահետազոտական ինստիտուտի մասնագետների հետ: Առանց կոնկրետ դեպք մատնանշելու՝ նա հետաքրքրվել է՝ եթե, ասենք, մարդու հիվանդության ախտորոշումը հիպերտոնիկ կրիզ է, ու այդ մարդը մի քանի օր գտնվում է վերակենդանացման բաժանմունքում, ապա ինչի՞ մասին կարող է դա վկայել:

«Հիվանդության ծանրության: Խորը ծանրության: Եթե նա մի քանի օր հիպերտոնիկ կրիզով գտնվում է ոեանիմացիայում, դա հիվանդության ծանր բարդության մասին է խոսում»,- թերթի թղթակցին պատասխանել է մասնագետը։