Սասուն Միքայելյանի կողմնակիցների նկատմամբ ճնշումները շարունակվում են. Մեսրոպ Մեսրոպյան (տեսանյութ)

Հրազդանում նախընտրական գործընթացը շարունակվում է լարված մթնոլորտում։ Քաղաքապետի թեկնածու Սասուն Միքայելյանի կողմնակիցներին, որոնք աշխատում են պետական և մասնավոր հիմնարկներում, ազատում են աշատանքից։

Լուրեր.com-ի թղթակիցը զրուցեց Սասուն Միքայելյանի նախընտրական ենթաշտաբի պետ Մեսրոպ Մեսրոպյանի հետ, որը հաստատեց այդ տեղեկությունները՝ մասնավորապես նշելով. «Մյուս թեկնածուն, որը Հրազդանի գործող քաղաքապետ Արամ Դանիելյանն է, օգտագործում է վարչական բոլոր ռեսուրսներն` իր նախընտրական քարոզարշավը կազմակերպելու համար։ Սասուն Միքայելյանի բոլոր այն կողմնակիցները, որոնք աշխատում են պետական հիմնարկներում, առանց լուրջ հիմնավորման ազատվում են աշխատանքից կամ նրանցից պահանջում են գոնե չգնալ Սասուն Միքայելյանի նախընտրական շտաբ և ընտրություններին իրենց ձայնը տալ ՀՀԿ անդամ Արամ Դանիելյանին։ Դպրոցների և մանկապարտեզների ուսուցիչներին պարտադրում են, որպեսզի դռնեդուռ ընկած՝ քարոզչություն անեն Արամ Դանիելյանի համար։ Այս ամենի պատճառով քաղաքում բարոյահոգեբանական լարված մթնոլորտ է ձևավորվել»։ 

Սակայն, ինչպես նշեց Մեսրոպյանը, «իրական հայրենասեր ու սկզբունքային մարդիկ չեն վախենում նման ճղճիմ իշխանությունների կողմից գործադրվող ճնշումներից»։ 

Հիշեցնենք, որ Հրազդանի քաղաքապետի՝ փետրվարի 12–ին կայանալիք ընտրություններին պայքարում են Հայ Ազգային Կոնգրեսի անդամ Սասուն Միքայելյանը և գործող քաղաքապետ, ՀՀԿ անդամ Արամ Դանիելյանը։