«Չորրորդ ինքնիշխանություն». ՀՀԿ-ականներն Արշալույսում հայտարարել են, որ «սաղին նակազատ են անելու»

Արշալույս գյուղում նախընտրական կրքերը ոչ միայն չեն հանդարտվում, այ գյուղապետի պաշտոնի համար պայքարող երկու թեկնածուներն արդեն հասցրել են գյուղի շուրջ 2800 ընտրողների շրջանակներում լուրջ լարվածություն մտցնել: Թեկնածուները երկուսն են. ՀՀԿ-ն առաջադրել է գործող գյուղապետ Զարզանդ Գրիգորյանին՝ ԱԺ պատգամավոր Հրանտ Գրիգորյանի հարազատ եղբոր թեկնածությունը, և ինքնառաջադրմամաբ առաջադրվել է Արշալույսի նախկին գյուղապետ Գրիգոր Գրիգորյանը: «Չորրորդ ինքնիշխանություն»-ը հիշեցնում է, որ իր երեկվա համարում անդրադարձել է սպասվելիք ընտրություններին՝ փորձելով ներկայացնել երկու թեկնածուներին էլ: Գրիգոր Գրիգորյանը, սակայն, ասել էր, թե չի ցանկանում հեռախոսով պատասխանել լրագրողի հարցերին, ավելին՝ վերջինս չէր համաձայնել հանդիպել լրագրողի հետ:

Երեկ առավոտյան, սակայն, ընթերցելով թերթի հրապարակումը, խմբագրություն էր զանգահարել  Գրիգոր Գրիգորյանը, որը հատկապես վիրավորվել էր հրապարակման այն հատվածից, համաձայն որի՝ Զարզանդ Գրիգորյանը նշում է, թե Գրիգոր Գրիգորյանը չի մասնակցել ղարաբաղյան պատերազմին: «Եթե Հրանտը, կամ իր եղբայր Զարզանդը չգիտեն, թե ես ինչ եմ արել պատերազմի ժամանակ, կարող էին իրենց զոհված հորեղբորից՝ Սամվել Գրիգորյանից այն ժամանակ ճշտեին, թե ես ինչ եմ արել պատերազմի ժամանակ: Մենք՝ ես ու ու նրանց հորեղբայրը՝ իմ մարտական ընկեր Սամվել Գրիգորյանը, զբաղվել ենք թիկունքի ապահովմամբ»,- թերթի հետ զրույցում ասել է Գրիգոր Գրիգորյանը: Վերջինս ասել է նաև, թե կարող ենք գնալ Արշալույս և հարցնել, թե ինչպես է վիրավորվել Զարզանդ Գրիգորյանը. «Բավականին հետաքրքիր պատմություն է»,- ասաց նա՝ այդպես էլ չբացելով փակագծերը:

Ի դեպ, երեկ սոցիալական կայքերում լուրեր էին շրջանառվում, թե ՀՀԿ-ականները Արշալույսում հայտարարել են՝ «Մեկ ա հաղթելու ենք, ու սաղին «նակազատ ենք» անելու»: