Մեկի աներձագը՝ պատգամավոր, մյուսինը՝ ակտիվիստ (տեսանյութ)

Դեռ այս տարվա մայիս ամսին, երբ Տարոն Մարգարյանը պաշտոնապես ներդրեց «աներձագաբաջանաղային մշակույթը» Հայաստանում և հանրությանը ներկայացրեց ու նաև պատգամավոր դարձրեց իր աներձագին, մի շարք գործիչներ և քրեաօլիգարխներ ոգևորվեցին և որոշեցին հետ չմնալ գործընթացից: Օրինակ, հենց այդ օրերին քրեաօլիգարխ-պատգամավոր Սամվել Ալեքսանյանը լրատվամիջոցներին պատմեց իր աներձագի մասին՝ մասնավորապես ասելով. «Իմ աներձագը պրեզիդենտ չէ, բայց մարդ ես, կարող է պատգամավոր դառնալ»:

Սամվել Լիմինդրովիչի աներձագը պատգամավոր չդարձավ, սակայն դրա փոխարեն դարձավ ակտիվիստ:

Համացանցում տարածված այս տեսահոլովակներում երևացող «Լֆիկյան ակտիվիստը» Lurer.com-ի ընթերցողների փոխանցմամբ` հենց ինքը՝ Ալեքսանյանի աներձագն է՝ «Պոնչ» մականունով, ով ամենուր է՝ Փակ շուկայի դիմաց, Կոմիտաս 5-ում: Եվ այս տեսանկյունից տրամաբանական են դառնում «ակտիվիստ» երիտասարդի խոսքերը, ով ասում է, թե և′ Կոմիտաս 5-ի, և′ Կոմիտաս 7-ի բնակիչ է, և եթե հարկ լինի, նորակառույց շենքում էլ բնակարան կգնի:

Փաստորեն, Լիմինդրովիչը շատ անզգուշորեն է կազմակերպում իր ակցիաները: Չեմ կարծում, թե նման ռեսուրսներ ունեցող մարդը չի կարող համապատասխան մարդկանց քանակ ապահովել և անհրաժեշտ թվով «ակտիվիստներ» կերտել, որ ստիպված առաջին գիծ է ուղարկում իր աներձագին կամ այլ մտերիմներին: Պարզապես լավ կազմակերպող չկա:

Սա շաքարավազի բիզնեսը չէ. նման ակցիաներ կազմակերպելու և ճիշտ ուղղորդելու համար համապատասխան հմտություններ են պետք, որոնք Yerevan City-ում չեն սովորեցնում:

Կարեն Վարդանյան

Տեսանյութերը՝ ստորև.