Կարո Եղնուկյանը դիմում է ոստիկանապետին

Կարո Եղնուկյանը կրկին դիմել է ՀՀ ոստիկանապետին։ Նրա դիմում-նամակը ներկայացնում ենք ստորև.

«ՀՀ Ոստիկանության պետ Վ. Գասպարյանին

Պատճենը` ՀՀ գլխավոր դատախազ՝ Ա. Հովսեփյանին

ՀՀ քաղաքացի Կարո Եղնուկյանից

Հասցե` ՀՀ, ք. Երևան, Զաքյան 8, բն. 37, Հեռ. 098209347

Կարո Եղնուկյանը ֆեյսբուքյան իր էջում հանդես է եկել ոստիկանապետին ուղղված դիմումով-նամակով, որում գրված է.

«Դ Ի Մ Ո Ւ Մ

Արդեն ութերորդ օրն է, որ Սամվել Ալեքսանյանին պատկանող «Ծածկած շուկայի» տնօրինությունը շենքի ճակատային հատվածում փակցրել է իմ նկարով մեծադիր պաստառ, որի վրա գրված են՝ «մասոն», «ո՛չ վարձու ընդդիմախոսներին, ո՛չ օտարերկրյա լրտեսներին, ո՛չ գրանտակերներին. դուք դեմ եք 700 աշխատատեղերի ստեղծման»:

Այս գործողության նպատակն իմ նկատմամբ ատելություն, խտրականություն և բռնություն հրահրելն է, ինչի մասին հրապարակավ զգուշացրել եմ սեպտեմբերի 2-ի տվածս հարցազրույցներում։ Նույն հարցով սեպտեմբերի 3-ին և 5-ին իր բողոքն է արտահայտել Նախախորհրդարանի քարտուղարությունը։

Սպասելի էր պատկան մարմինների գործնական միջամտութիւնը, սակայն անգործություն ցուցաբերվեց, ինչը իմ կարծիքով բռնության այդ կոչն իրականացնելու փորձի պատճառ դարձաւ։

Ինչպես հայտնի է, երեկ երեկոյան իմ բնակության շենքի մոտ հարձակում է տեղի ունեցել երկու անձանց վրա, որոնց դիմել են «ախպա՞ր ես» արտահայտութեամբ։ Կարծում եմ, նկատի են ունեցել իմ ներգաղթյալ լինելու հանգամանքը։

Այս հարձակման` իմ անձի դեմ ուղղված լինելու մասին է վկայում նաև այն փաստը, որ հարձակման ենթարկվածներից մեկը` Սուրեն Սաղաթելյանը, ապրում է Զաքյան 3 շենքի 37 բնակարանում: Իմ բնակարանի համարը` նույն 37-ն է, նույն Զաքյան փողոցի 8-րդ շենքում, ինչը փաստում է, որ հարձակվողներն ընդամենը շփոթել են շենքի համարը:

Հաշվի առնելով վերեւում շարադրավածը պահանջում եմ քրեական պատասխանատվության ենթարկել իմ անձի նկատմամբ ատելություն, խտրականություն և բռնություն հրահրելու նպատակով Ծածկած շուկայի ճակատային մասին պաստառ փակցրած անձանց, ինչպես նաև հնարավորինս շտապ կերպով կարգադրել հանել այդ զրպարտչական եւ սադրիչ բովանդակութեան պաստառը:

Միևնույն ժամանակ` պահանջում եմ օրենքով սահմանված կարգով միջոցներ ձեռնարկել իմ և իմ ընտանիքի անդամների ֆիզիկական անվտանգությունն ապահովելու ուղղությամբ:

Առդիր` իմ անձնագրի պատճենը․

Դիմող` Կարո Եղնուկյան 09 սեպտեմբերի 2013 թ.»։