«Ես ստորագրում եմ, ու խիղճս էլ ինձ սիրու՛մ է դրա համար». Հովհաննես Ազոյանը` Տիգրան Առաքելյանի ազատ արձակման երաշխավորագրի տակ

Այսօր ՀՀ վերաքննիչ քրեական դատարանում տեղի կունենա քաղբանտարկյալ Տիգրան Առաքելյանի գործով դատավարության հերթական դատական նիստը: Նախատեսվում է, որ նիստի ընթացքում ԱԺ ՀԱԿ խմբակցության ղեկավար Լևոն Զուրաբյանը հանդես կգա միջնորդությամբ, որտեղ կառաջարկի Տիգրան Առաքելյանի նկատմամբ որպես խափանման միջոց կիրառել իր անձնական և նյութական երաշխավորությունը:

Սիրված դերասան Հովհաննես Ազոյանը իր ֆեյսբուքյան էջում հայտարարել է, որ միանում է Զուրաբյանի երաշխավորությանը` կատարելով հետևյալ գրառումը.

«Ես ստորագրում եմ, ու խիղճս էլ ինձ սիրու՛մ է դրա համար....................................................................................... »

Ստորև ներկայացնում ենք նաև Լևոն Զուրաբյանի երաշխավորությոնը.

«ՀՀ Վերաքննիչ քրեական դատարանի դատավոր տիկին` Եվա Դարբանյանին

Ես, Լեւոն Զուրաբյանս, ՀՀ Ազգային ժողովի պատգամավոր, Հայ Ազգային Կոնգրես խմբակցության ղեկավար, ղեկավարվելով ՀՀ Քրեական դատավարության օրենսգրքի 134-րդ հոդվածի 2-րդ մասի 4-րդ կետով եւ 145-րդ հոդվածի 1-ին եւ 2-րդ մասերով, իմ խոսքով եւ մուծվող դրամական գումարով երաշխավորում եմ, որ թիվ ԵԿԴ/0225/01/11 քրեական գործով ամբաստանյալ Տիգրան Առաքելյանը կդրսեւորի պատշաճ վարքագիծ, քրեական վարույթն իրկանացնող մարմնի կանչով կներկայանա եւ այլ դատավարական պարտականությունները կկատարի համաձայն քրեական դատավարության օրենսգրքի:

Ելնելով վերոգրյալից, խնդրում եմ, ղեկավարվել ՀՀ քրեական դատավարության օրենսգրքի 147-րդ հոդվածով եւ ամբաստանյալ Տիգրան Առաքելյանի նկատմամբ որպես խափանման միջոց կիրառել անձնական երաշխավորությունը:

Քրեական դատավարության օրենսգրքով նախատեսված երաշխավորության գումարը կվճարվի որոշումը կայացվելուն պես' դատարանի դեպոզիտ հաշվին:

Հարգանքներով`
ԱԺ պատգամավոր'Լեւոն Զուրաբյան»: