Սերժ Սարգսյանն այսօր կքանդի՞ անհանդուրժողականության պատը

Այսօր ՀՀ վերաքննիչ քրեական դատարանում տեղի կունենա քաղբանտարկյալ Տիգրան Առաքելյանի գործով դատավարության հերթական դատական նիստը: Նախատեսվում է, որ նիստի ընթացքում ԱԺ ՀԱԿ խմբակցության ղեկավար Լևոն Զուրաբյանը հանդես կգա միջնորդությամբ, որտեղ կառաջարկի Տիգրան Առաքելյանի նկատմամբ որպես խափանման միջոց կիրառել իր անձնական և նյութական երաշխավորությունը:

Հայտնի է, որ Զուրաբյանի նախաձեռնությանը միացել են դերասան Հովհաննես Ազոյանը և հասարակական-քաղաքական գործիչներ:

Առաքելյանի դատավարությունը այսուհետ կրում է քաղաքական հետաքրքիր ուղերձ: Եթե իշխանությունների բարեհաճությունը վայելող անձինք բոլորի աչքի առաջ մարդ են սպանում և իրավապահ մարմինների հովանավորությամբ ազատվում են պատժի կրումից` ինքնապաշտպանություն խիստ հումանիստական հոդվածով, ապա Տիգրան Առաքելյանի միակ մեղքն այն է, որ հայտնում է իշխանությունների տեսակետից տարբերվող տեսակետ, սակայն անտարբերության է մատնվել միջազգային կառույցների և հասարակական ակտիվի կողմից: Առանց փոքր-ինչ վարանելու իշխանությունները կարող են մարդ սպանած անձին ազատ արձակել, նույնիսկ արժանանալ նրա հոր «մունաթին», իսկ այլախոհության համար զնդանված Տիգրանին ազատ արձակելու քաջություն այդպես էլ չունեցան: Գիտեք ինչո՞ւ: Որովհետև անգամ բանտային ռեժիմը չի կարողանում կոտրել երիտասարդ այլախոհի ընդվզումը: Իսկ ընդվզումը, որը ցանկացած նորմալ պետության շարժիչ ուժն է, Հայաստանում պատժվում է խոշտանգումներով և բանտարկություններով:

Տիգրան Առաքելյանի այսօրվա դատավարությունը շատ կարևորագույն հասարակական ուղերձ ունի: Եթե Տիգրանը ազատ չարձակվի, նշանակում է, որ ամենաբարձր մակարդակով Հայաստանում հովանավորվում են քրեածին տարրերն ու մարդասպանները` իրենց լոյալության դիմաց, իսկ այլախոհ քաղաքացիները ազատության մեջ գոյատևելու որևէ երաշխիք չունեն:

Ժամանակին Սերժ Սարգսյանի կողմից շատ էր խոսվում անհանդուրժողականության պատը քանդելու մասին: Այսօր դատավորը իր ձեռքի մուրճիկով առաջին հարվածները կարող է հասցնել այդ ոգեղեն պատին:

Իսկ դատավորը, ինչպես բոլորս գիտենք, սպասում է իշխանությունների հրահանգին:

Վարուժան Բաբաջանյան