Թուրքիան Գերմանիայից Հայոց ցեղասպանության հարցով օգնություն է խնդրել

Թուրքիայի՝ Եվրոպական միության հարցերով նախարար Էգեմեն Բաղըշը Գերմանիայից օգնություն է խնդրել Հայոց ցեղասպանության հարցով  Թուրքիայի և Ֆրանսիայի միջև լարվածությունը կարգավորելու համար։ Այդ մասին Բաղըշը հայտարարել է Welt–ին տված հարցազրույցում։

Բաղըշը պատմական հարցի լուծման համար դիմել է Գերմանայի իշխանություններին։ Ըստ նրա, գերմանական արխիվներում 1915 թվականի իրադարձությունների մասին բավականին նյութեր պետք է լինեն, որոնք կարող են մի շարք վիճահարույց հարցերի լուծում տալ։ Թուրք նախարարը   պաշտոնական Բեռլինին կոչ է արել արխիվները բացել պատմաբանների համար։

Վերջինս հայտարարել է, որ մինչ այժմ իր տեսած փաստաթղթերի համաձայն, Օսմանյան կայսրությունում հայերի նկատմամբ ոչ կանխամտածված բնաջնջում է եղել քաղաքացիական պատերազմի ժամանակ։ Ըստ նրա, այդ ժամանակ զոհվել են և՛ թուրքեր, և՛ հայեր։

Հիշեցնենք, որ անցյալ շաբաթ Դավոսում ընթացող տնտեսական ֆորումի ժամանակ Բաղըշը ի նշան Ֆրանսիայի Սենատի կողմից Հայոց ցեղասպանության հերքումը քրեականացնող օրենքի ընդունման բողոքի հայտարարել էր, որ «ինքը հերքում է հայերի ցեղասպանության փաստը և թող գան իրեն ձերբակալեն»։ Շվեյցարիան թուրք նախարարի հայտարարության կապակցությամբ քրեական գործ է հարուցել։