«Գալուստը երրորդ ապտա՞կն է ուզում ստանալ»

Կարծում եմ` այսօր հայ հասրակությունը հասկացողության հետ խնդիրներ չունի և հեշտությամբ ընկալում է ցանկացած խոսքի թե′ ուղղակի և թե′ անուղղակի իմաստները: Շտեֆան Ֆյուլեի հայտարարությունը որ իմաստով էլ փորձես ընկալել, արդյունքը նույնն է. ԵՄ Ասոցացման համաձայնագրի նախաստորագրումը չի լինի. Հայաստանի առջև պարզապես ճանապարհները փակեցին, Հայաստանը ստացավ հերթական ապտակը:

Սա այնքան պարզ է, որ նույնիսկ Գալուստ Սահակյանին է հասկանալի: Այլ բան է, որ «քաղաքական մտքի ռահվիրան» այսօր լրագրողների հետ հանդիպմանը կրկին պնդել է, թե ԵՄ հետ համագործակցության ուղղությամբ տարվող աշխատանքները շարունակվելու են, համագործակցություն այլ ֆորմատով լինելու է և այլն, և այլն: Գրիգորիչը պարզապես աշխատում է` իրեն վստահված դերն է կատարում: Որպես «լղոզելու» մեծ վարպետ` փորձում է «լղոզել» նույնիսկ մեծն կոմբինատոր Սերժ Սարգսյանի անհաջող շախմատային հնարքները: Միևնույն է, չի ստացվում, բայց դե Գալուստ Սահակյանն իր անելիքը գիտի՝ հա′մ վերևից մեսիջն է փոխանցում, հա′մ էլ երկնում իր հերթական գլուխգործոցը. պարզվում է, որ «Եթե ասում են «և′... և′», եթե մի ուրիշ տեղ էլ «և»-ի խնդիր լինի, որ մեր պետությանն անհրաժեշտ է, էդտեղ էլ պիտի փորձենք համագործակցություններ ունենալ»,-ասել է Գ.Սահակյանը լրագրողների հետ հանդիպման ժամանակ:

«Ե′վ... և′»-ը, ըստ էության, երկու ապտակ է՝ և′ մի կողմից, և′ մյուս: Հիմա Գրիգորիչը նորացված մոդելն է առաջարկում՝ «և′... և′... և′»: Փաստորեն, մեր իշխանություններին երկու ապտակը քիչ է, երրորդն է՞լ են ուզում… Իսկ թե ումից, դա էլ ժամանակը ցույց կտա:

Կարեն Վարդանյան