Ի՞նչ է անելու Ֆոլկլենդյան կղզիներում բրիտանական սուզանավը

Մեծ Բրիտանիայի ռազմածովային ուժերը Ֆոլկլենդյան կղզիներ են ուղարկել ատոմային սուզանավ, հաղորդում է «The Daily Mail» պարբերականը՝ հղում անելով երկրի պաշտպանության նախարարության իր աղբյուրին։ Հիշեցնենք, որ կղզիների պատկանելիության հարցը երկար ժամանակ է վեճի առարկա է Մեծ Բրիտանիայի և Արգենտինայի միջև։

Թերթի տեղեկություններով՝ «Թրաֆալգար» տեսակի սուզանավը Ֆոլկլենդյան կղզիներ կժամանի այս տարվա ապրիլին՝ 1982թ. արգենտինա–բրիտանական պատերազմի 30-ամյակի նախօրեին։ Թե ի՞նչ է անելու բրիտանական սուզանավը Ֆոլկլենդյան, կամ ինչպես Արգենտինայում է ընդունված կոչել Մալվինյան կղզիներում, հարցին Մեծ Բրիտանիայի պաշտպանության նախարարությունից չցանկացան մեկնաբանություն անել։ Պարզ է մի բան, որ առանց այդ էլ լարված արգենտինա–բրիտանական հարաբերություններն էլ ավելի կվատթարանան։

Հիշեցնենք, որ 1833 թվականից ի վեր Մեծ Բրիտանիան այս կղզիները համարում է իր սեփականությունը և չի պատրաստվում դրանք զիջել որևէ երկրի՝ չնայած որ դրանք Մեծ Բրիտանիայի բուն տարածքից գտնվում են հազարավոր կիլոմետրերի հեռավորության վրա՝ Արգենտինայի մոտակայքում։ Ֆոլկլենդյան կղզիների վերաբերյալ կա նաև ՄԱԿ–ի բանաձև, որը նախատեսում է երկու երկրների միջև կառուցողական բանակցությունների միջոցով որոշել կղզիախմբի հետագա կարգավիճակը։ Այդ բանաձևի համաձայն՝ երկու կողմերն էլ պետք է զերծ մնան կղզիախմբի ավազանում «սեփականատիրական» նախաձեռնություններից՝ մինչև բանակցությունները։ Սակայն, կարծես թե, պաշտոնական Լոնդոնը չի պատրաստվում կատարել ՄԱԿ–ի բանաձևում առկա նախապայմանները։