Ողբալի վիճակ. «Հիպոկրատ-միպոկրատ չգիտեմ, բայց էդ բոմժի հետքը էլ ստեղ չտենամ»

Լիանա Մարտիրոսյանը Facebook սոցցանցի իր էջում գրել է.

«Վերջերս Երևանի ատամնաբուժական կենտրոններից մեկում մասնակից դարձա մի փոքրիկ միջադեպի,որն ինձ ոչ միայն ապշեցրեց ու հիասթափեցրեց,այլև խոր ցավ պատճառեց: Զարմանքիս պատճառը այնտեղ աշխատող «մեծ արհեստավարժություն ունեցող» մի բժշկի պահվածքն էր,ով ,բառիս բուն իմաստով,խախտում էր ոչ միայն «Հիպոկրատի երդումը»,այլ նաև «մարդ լինելու,մարդասիրության երդումը»:Նա սպառնում և «մատ էր թափ տալիս» մի տարեց կնոջ վրա ,ով իր մտավոր կարողություններից զուրկ երեխայի հետ եկել էր օգտվելու ատամնաբույժի ծառայություններից: Պարզապես խնդիրն այն էր,որ բժիշկը պետք է անվճար սպասարկեր նրանց'ըստ օրենքի սահմանված կարգի:Բայց նա անընդհատ ձգձգում էր այդ մի քանի րոպե պահանջող աշխատանքը,և երբ կինը սկսեց բողոքել ու հորդորել,որ արագ սպասարկի,որովհետև երեխան վատ է զգում,բժիշկը բարկացավ ու գրեթե բղավելով սկսեց խոսել.

-Բան ու գործս թողած պետքա ընկնեմ բոմժերի հետևից,էլ դարդուցավ չունեմ պետքա ձրի մարդ բուժեմ:Դուրներդ չի գալիս թողեք գնացեք ստեղից:

Հետաքրքիր է,թե ինչից պիտի գոհ լինենին.մարդասիրաբար կատարած աշխատանքից,թե խայթող ու ծաղրական հայացքներից:Ես ,չկարողանալով զսպել ինքս ինձ,մոտեցա և հիշեցրի օրենքով սահմանված կարգի մասին,նաև ասացի,որ պետք չէ մոռանալ Հիպոկրատի երդման մասին,իսկ նա ի պատասխան դրան սպառնալից հայացքով նայեց ու ասաց.

- Հիպոկրատ-միպոկրատ չգիտեմ,բայց էդ բոմժի հետքը էլ ստեղ չտենամ,թե չե լավ չի լինի:Դու էլ մի խառնվի մեծերի խոսակցությանը,այդքան սիրտդ ցավումա դու տուր փողը,թե չէ եկել գլխիս սուրբ Սոֆյա ես դառել ,որ ինչ :
Ասաց ու հեռացավ' անպատասխան թողնելով և ինձ,և կնոջը:

Թեև կինը սկսեց բղավել,որ կբողոքի,այդպես չի թողնի,այնուհանդերձ պատասխանող չկար ու չկար…

Ահա այսպիսի ողբալի վիճակում է մեր հասարակությունը, սա ընդհամենը մի փոքրիկ դեպք էր,այն հազարների դեմ,որոնք կատարվում են մեր առօրյայում:Հիպոկրատի երդում պետք է տա ոչ միայն յուրաքանչյուր բժիշկ,այլ յուրաքանչյուր բանական մարդ:Չէ որ բոլորիս պարտքն է օգնել ընկածին,սատարել հալածվածին,ուժ տալ հիասթափվածին:Իսկ մենք անում ենք լրիվ հակառակը(խեղճ Հիպոկրատ,ըստ երեևույթին, 3 պտույտ կատարեց գերեզմանում):Իսկ եթե հրաժարվում ենք մարդասիրաբար կատարել,հարգել մեր աշխատանքը ,ուրեմն եկեք մինգամից հրաժարվենք Վերյալի կողմից տրված տիտղոսից 'արարչության պսակ,այսինքն մարդ լինելուց»: