Գրիգորիչն առյուծի կա՞թ է խմել

Այսօր Aravot.am-ի հետ զրույցում հայոց քաղաքական մտքի «ռահվիրա» Գալուստ Սահակյանը խոսել էր մեկ այլ՝ ոչ պակաս «մտքի ռահվիրա» Պարույր Հայրիկյանի մասին, ով համատեղության կարգով նաև անկախության սիմվոլ է աշխատում: Անդրադառնալով Հայրիկյանի՝ Սերժ Սարգսյանի հրաժարականի պահանջին՝ Գրիգորիչը հեգնանքով ասել է, որ դա սարսափելի վախենալու բան է, հետո էլ ավելացրել, որ Հայրիկյանին շատ լավ է ճանաչում, գիտի նրա նկատառումները, մոտեցումները, վարքը, վարկանիշը, ուստի չի ուզում տարօրինակ վերլուծությունների ենթարկել: Այս կապակցությամբ ՀՀԿ փոխնախագահին արժե շնորհակալություն հայտնել, որ ազատեց մեզ իր անհոդաբաշխ մտքերով լեցուն վերլուծություններից:

Կարծում եմ` Գ.Սահակյանը շատ լավ գիտակցում է, թե ում հետ գործ ունի` մի մարդու, ում հետևից 43 տարի է՝ ընկած է ռուսական ԱԱԾ-ն, փորձում է վերացնել և ոչ մի կերպ չի կարողանում, մի մարդու, ում նույնիսկ երկու վարձու մարդասպանները չկարողացան սպանել 20 սմ հեռավորությունից: Հետո ի՞նչ, որ վարձու մարդասպանները «կաֆել ու մետլախ խփող էին», 20 սմ-ից նույնիսկ «պարկետ խփողի» օգնականը կկարողանար դիպչել: Այսինքն՝ պատճառը Հայրիկյանի զորությունն է, և հիմա Գալուստ Գրիգորիչն առնվազն պետք է առյուծի կաթ խմած լինի, որպեսզի մարտահրավեր նետի անկախության սիմվոլին:

Բայց արի ու տես, որ նետեց, և հիմա պետք է սպասենք Հայրիկյանի պատասխանին:

Համոզված եմ՝ շատ ուշագրավ և ուրախալի գզվռտոց կարող է լինել:

Կարեն Վարդանյան