Մեկ օրում 117 մարդ է սպանվել Սիրիայում

Նախօրեին 117 մարդ է սպանվել Սիրիայում շարունակվող բախումների ժամանակ։ Սիրիայի Հեղափոխական բարձրագույն խորհուրդը հայտնել է, որ փետրվարի 8–ին 93 մարդ է սպանվել Հոմս քաղաքում, որն արդեն 5 օր է՝ հրետանային ռմբակոծության է ենթարկվում Սիրիայի կառավարական զորքերի կողմից։ Ապստամբները, որոնց ձեռքում է գտնվում քաղաքի պաշտպանությունը, հայտնել են, որ ամեն րոպե պայթյուններ են լսվում։ 

Հոմս քաղաքը համարվում է ապստամբների հիմնական հենակետային քաղաքը, որն ամեն վայրկայն օդային և հրետանային ռմբակոծության է ենթարկվում քաղաքի մերձակայքում տեղակայված կառավարական ուժերի կողմից, հաղորդում է Lenta.ru–ն։

Ինչպես հաղորդում է Al Jazeera-ն, ՄԱԿ-ի Գլխավոր քարտուղար Բան Կի Մունը հայտարարել է, որ Արաբական երկրների լիգայի դիտորդական առաքելությունը վերսկսում է իր դիտորդական գործունեությունը Սիրիայում, որը բռնությունների կտրուկ աճի պատճառով հունվարի վերջին ժամանակավորապես դադարեցրել էր աշխատանքները։