Մերօրյա «Մեծապատիվ մուրացկանները»

Դեռ 5 օր առաջ էր, երբ արդեն նախկին գլխավոր դատախազ Աղվան Հովսեփյանը Հայաստանում ԱՄՆ դեսպան Ջոն Հեֆերնի հետ ստորագրել էր նամակ-համաձայնագրի փոփոխությունը, որի համաձայն՝ մոտ 2,2 միլիոն ԱՄՆ դոլարի լրացուցիչ օժանդակություն կտրամադրվի Հայաստանին դատաիրավական ոլորտում մի շարք աջակցության ծրագրերի իրականացման համար: Սա այն դեպքում, երբ մենք գիտենք, թե ինչպիսի վիճակում է այսօր մեր դատաիրավական ոլորտը, մանավանդ եթե հիշենք Սուրիկ Խաչատրյանի որդու ազատ արձակումը, ինչպես նաև այսօր Տիգրան Առաքելյանի ազատ արձակմանն ուղղված միջնորդության մերժումը: Այսինքն` հերթական գումարը կորզվեց ԱՄՆ-ից, որը դեռ հայտնի չէ, թե ինչի վրա կծախսվի:

Այլ տերություններից, հատկապես ԱՄՆ-ից փող ուզելն արդեն արմատավորված մշակույթ է դարձել մեր պետական այրերի շրջանում: Պարզապես անունը դրվում է «օգնություն», իսկ էությունն ավելի շատ համապատասխանում է մուրացկանությանը: Պարոնյանի հանրահայտ ստեղծագործության հերոսներն էլ Աբիսողոմ Աղայից տարբեր հարցերով օգնություն էին խնդրում՝ այդպիսով դառնալով նաև «մեծապատիվ» մուրացկաններ:

Վարչապետ Տիգրան Սարգսյանը երևի որոշեց հետ չմնալ թե′ Պարոնյանի, և թե′ մեր ժամանակի հերոսներից և այսօր նույն Ջոն Հեֆերնից և ԱՄՆ Միջազգային զարգացման գոծակալության ծրագրի ղեկավար Քերըն Հիլլիարդից խնդրեց 1 մլն ԱՄՆ դոլար՝ իբրև թե գյուղատնտեսական հաշվառումն իրականացնելու նպատակով:

Մեկ միլիոն դոլարով, իհարկե, կարելի էր հայաստանցիների համար շատ ավելի լուրջ հարցեր լուծել, և ծախսն էլ ավելի թափանցիկ և տեսանելի կարող էր լինել: Իսկ հիմա արի ու իմացիր, թե ինչպես է կատարելու այդ գյուղատնտեսական հաշվառումը և, ընդհանրապես, ինչ հաշվառման մասին է խոսքը, կամ, ավելի պարզ ասած՝ ուր և ում գրպանն են գնալու այդ փողերը:

Ի դեպ, հիշեցնեմ, որ նույն՝ ԱՄՆ Միջազգային զարգացման գոծակալության ծրագրի ղեկավար Քերըն Հիլլիարդը և դեսպան Ջոն Հեֆերնը դեռ այս տարվա հունվարի 30-ին հանդիպել էին Տիգրան Սարգսյանի հետ և քննարկել ԱՄՆ ՄԶԳ կողմից Հայաստանին օժանդակելու հինգամյա ռազմավարությունը, ժողովրդավարության և կառավարման ոլորտի ծրագրերի աջակցման նոր համաձայնագիրը, որի շրջանակում ԱՄՆ-ն առաջիկա 5 տարիների ընթացքում ծրագրում է Հայաստանին տրամադրել 32 մլն դոլարի օգնություն:

Այնպես որ, «մեծապատիվ մուրացկանություն» անելու առիթներ և ժամանակ դեռ կլինեն առաջիկա տարիներին:

Կարեն Վարդանյան