Իշխանություններն այս օրինագծով վերարտադրվելու փորձ են անում. Սուրեն Աբրահամյան

Կառավարությունը երեկ Ազգային Ժողով ներկայացրել է արտակարգ դրության իրավական ռեժիմի մասին օրենքի փոփոխված տարբերակը, որի համաձայն՝ արտակարգ դրության ժամանակ բանակը կարող է միջամտել, եթե ոստիկանությունն ու ազգային անվտանգության ուժերն ի վիճակի չեն լուծել ծագած խնդիրները։

Օրենքի փոփոխված տարբերակը մի շարք պատգամավորների կողմից բուռն քննարկումների առիթ է դարձել։ Նույնիսկ կոալիցիայի իշխող կուսակցության պատգամավոր Ռաֆիկ Պետրոսյանը օրենքի նախագիծը հակասահմանադրական է համարել։ 

Լուրեր.com–ի լրագրողի հարցին, թե ինչպե՞ս կմեկնաբանի օրենքի փոփոխությունը, Հայ ազգային կոնգրեսի մաս կազմող Հանրապետություն կուսակցության խաղխորհրդի անդամ, ՆԳ նախկին նախարար Սուրեն Աբրահամյանը պատասխանեց, որ ներկայիս իշխանություններն, անցյալի դառը փորձը հաշվի առնելով, ուղղակի օրենքի փոփոխությունով փորձում են ապահովագրել ընտրությունների միջոցով իշխանության վերարտադրությունը։ Ըստ նրա՝ անցյալի դառը փորձը և ներկա քաղաքական իրավիճակն է ստիպում իշխանություններին այդ օրենքը փոփոխել, քանի որ Ռոբերտ Քոչարյանը մարտի 1–ը իրականացրեց՝ հաշվի չառնելով Սահմանադրության 55–րդ հոդվածը, այն է՝ երկրի ներքին գործերին բանակի միջամտելու արգելքը։ 

Եթե նրանք ցանկանում են այդ օրենքը փոփոխել, ապա դրա համար երեք տարի ժամանակ ունեին։ Թող մասնագիտական և հանրային քննարկումներ անցկացնեին և տեսնեին՝ անհրաժե՞շտ է փոփոխություններ մտցնել, թե՞ ոչ, մեր հետ զրույցում ասած Սուրեն Աբրահամյանը։  

«Այդքան «պուպուշ» օրենքներ ընդունելու փոխարեն նրանք պետք է համարժեք քաղաքական կամք դրսևորեն՝ դրանք իրագործելու համար, այլապես ուղղակի պետք է՝ իբրև սահմանադրական դրույթ ընդունեն, որ Հայաստանում իշխանությունն անփոփոխ է»,- հավելեց Աբրահամյանը։