Ինչով է զբաղված թիվ 14 ընտրատարածքի պատգամավորը. Վրեժ Մարկոսյանը երբևէ ԱԺ ամբիոնից հանդես չի եկել

Վերլուծական 23 Սեպտեմբեր, 2013 23:23

Մեծամասնական ընտրակարգով ընտրված պատգամավորները, թվում է, իրենց ակտիվությամբ պետք է դղրդացնեին Ազգային ժողովը: Կառավարության անդամները պետք է ամեն անգամ նրանց տեսնելիս ճանապարհը փոխեին, որովհետև յուրաքանչյուր ընտրատարածքի բնակչությունը այնքան դարդուցավ ունի, որոնցից շատերի լուծումը ոչ այնքան բյուջետային միջոցներ ու ֆինանսական ներդրումներ է պահանջում, որքան օրենսդրական լուծումներ, հարցապնդումներ, միջամտություններ` պետական գերատեսչությունների մակարդակով: Սակայն մեծամասնականով ընտրված պատգամավորների ճնշող մեծամասնությունը ԱԺ-ում կենդանության նշաններ ցույց չի տալիս, իսկ իրենց ընտրատարածքների բնակչության խնդիրները շարունակում են մնալ օդից կախված: Անհասկանալի է, թե պետությունն ինչու է աշխատավարձեր վճարում նրանց` մի աշխատավայրում հայտնվելու համար, որտեղ այդ մարդիկ զբաղվում են ամեն ինչով` բացի պատգամավորի աշխատանքից:

Եվ այսպես, սկսում ենք շարք, որտեղ պարբերաբար կանդրադառնանք ԱԺ մեծամասնականով ընտրված պատգամավորների գործունեությանը: Ընդ որում` այդ անդրադարձը կրելու է պարբերական բնույթ: Ընտրատարածքների բնակիչները հստակ թվերով պետք է տեղեկացվեն, թե իրենց «ընտրյալները», բացի ԱԺ բուֆետում սուրճ խմելուց, ինչով են զբաղվում այդ հույժ կարևոր պետական կառույցում:

Օրվա հերոսներին կընտրենք պատահականության սկզբունքով:

Մեր առաջին «հյուրը» թիվ 14 ընտրատարածքից ԱԺ պատգամավոր ընտրված ՀՀԿ խմբակցության պատգամավոր Վրեժ Մարկոսյանն է, ով «Տիգրան Մեծ» հրատարակչության սեփականատերն է: 2012 թ. մայիսի 6-ին ԱԺ պատգամավոր է ընտրվել թիվ 14 ընտրատարածքից, որն ընդգրկում է Ապարանի, Աշտարակի տարածաշրջանները և ունի շուրջ 57 000 ընտրող: 57 000 մարդու ապավեն հանդիսացող պատգամավորը իր ամբողջ պատգամավորական գործունեության ընթացքում 20 անգամ բացակայել է ԱԺ նիստերից և երբևէ հանդես չի եկել ելույթներով և կառավարությանն ուղղված հարցերով: Ստացվում է, որ այն ընտրատարածքը, որտեղից Մարկոսյանը պատվիրակվել է Ազգային ժողով, որևէ խնդիր չի ունեցել, որի մասին կարելի էր բարձրաձայնել խորհրդարանական ամբիոնից: Ենթադրվում է, որ ԱԺ-ի ընդունած օրինագծերը գրեթե ամբողջությամբ համապատասխանում են թիվ 14 ընտրատարածքի բնակչության շահերին, որովհետև Վրեժ Մարկոսյանը ընդամենը 2 անգամ է դեմ քվեարկել, մինչդեռ օրինագծերից 172-ը պատգամավորի «սրտով» է եղել, և նա կողմ է քվեարկել:

Այսքանից հետո մնում է պարզել, թե ՀՀԿ-ն իր` մեծամասնականով ընտրված պատգամավորների օգտակար գործողության գործակիցը ինչով է չափում: