«Ժողովուրդ». Հովիկ Աբրահամյանի որդու հետ բախված Վիլեն Ղազարյանը կալանավորված է

«Ժողովուրդ»-ի լավատեղյակ աղբյուրների փոխանցմամբ՝ «Հայռուսգազարդ» ընկերության Արտաշատի տեղամասի նախկին պետ Հովհաննես Ղազարյանի որդուն՝ Վիլեն Ղազարյանին, ոստիկանությունը նախօրեին տեղափոխել է Հայաստան՝ ոստիկանության Արտաշատի բաժին: Թերթը հիշեցնում է, որ նա ձերբակալվել էր Օդեսայում, քանի որ մեղադրվում էր սպանության փորձ կատարելու մեջ: Վիլենը բախվել էր ԱԺ նախկին նախագահ Հովիկ Աբրահամյանի որդու և եղբորորդու հետ, երբ հնչեցին կրակոցներ: Ոստիկանության հասարակայնության հետ կապերի և լրատվության բաժնից հաստատեցին «Ժողովուրդ»-ի տեղեկությունը ՝ ավելացնելով, որ փետրվարի 8-ին Կիև-Երևան չվերթով Հայաստան է տեղափոխվել հետախուզության մեջ գտնվող Վիլեն Ղազարյանը: Հարուցվել է քրեական գործ 34 (հանցափորձ) հոդվածի և 104 հոդվածի 2-րդ մասի 6-րդ կետի հատկանիշներով՝ սպանություն՝ շատերի կյանքի համար վտանգավոր եղանակով: Վիլենը կալանավորված է: