Մեր կոչումը ձեր փրկությունն է. ԱԻ նախարարության ընդլայնված նիստը մեկնարկել է (Ֆոտոռեպորտաժ, տեսանյութ)

Քիչ առաջ Արտակարգ իրավիճակների նախարարությունում մեկնարկել է նախարարության ընդլայնված նիստը, որին մասնակցում են նախարար Արմեն Երիցյանը և ԱԽՔ Արթուր Բաղդասարյանը։ Նախարարության ընդլայնված նիստում ամփոփվելու են ԱԻՆ 2011-ի գործունեության արդյունքները։ Այս պահին ելույթ է ունենում ԱԻՆ փոխնախարար Հայկարամ Մխիթարյանը, որը հայտարարեց, որ 2011-ի կտրվածքով՝ 10 տոկոսով աճել է արտակարգ պատահարների թիվը, ինչի հետևանքով 0,6 տոկոսով աճել է մահացությունների, 23-տոկոսով՝ վիրավորումների թիվը։ Փոխնախարարը հայտնել է, որ նախարարության արձանագրած հաջողությունների համար 2011-ին ՄԱԿ-ը Հայաստանը ճանաչել է Ձեռքբերումների և լավագույն փորձի երկիր։ Միայն 2011-ին փորձառության նպատակով Հայաստանի ԱԻՆ են այցելել ավելի քան 20 երկրների փորձագետներ ու պաշտոնյաներ։ Օգնություն ու փրկարարներ ներմուծող երկրից Հայաստանն այսօր վերածվել է օգնություն ու փրկարար, գիտելիք արտահանող երկրի։ Նախարարության գործունեությունը ներկայացնող հաղորդագրության մեջ առանձին տողով նշված է, որ հոկտեմբերին ԱԻՆ-ը մարդասիրական օգնություն է հասցել երկրաշարժից տուժած Թուրքիայի Վան քաղաք։ Նշենք նաև, որ ԱԻՆ ընդլայնված նիստն անցնում է «Մեր կոչումը ձեր փրկությունն է» կարգախոսով։ 

Մեր տեղեկություններով՝ քիչ անց սկսվելու է պարգևատրման գործընթացը։ Ինչպես հայտնում են մեր աղբյուրները, մեդալ է շնորհվել նաև Լուրեր.com-ի ֆոտոլրագրող Գագիկ Շամշյանին։ 

Լուսանկարները և տեսանյութը՝ Գագիկ Շամշյանի։