«Դեմիրճյանը ծիտիկի նշան է արել ԿՈՂՄ-ի կողքը». Ալեքսանդր Արզումանյան

Ազգային ժողովի այսօրվա նիստում պատգամավորները ընտրեցին ՀՀ նոր Գլխավոր դատախազին: Քվեարկությանը մասնակցել է 108 պատգամավոր: Գևորգ Կոստանյանը ստացել է 103 կողմ և 3 դեմ ձայն:

Նախքան քվեարկությունը' ընդդիմադիր խմբակցություններից երկուսը՝ ՀԱԿ-ն ու «Ժառանգությունը», հայտարարել են, որ դեմ են քվեարկելու Գլխավոր դատախազի թեկնածությունը, սակայն ընդամենը 3 պատգամավոր է դեմ քվեարկել Կոստանյանի թեկնածությանը:

«Ես հստակ մի բան գիտեմ. ես ԴԵՄ եմ քվեարկել: Եւ դա արել եմ առանց օդացունց հայտարարությունների:

Անմեկնելի են ընդդիմադիր ճանապարհները...»,- ավելի ուշ իր ֆեյսբուքյան էջում գրեց «Ազատ Դեմոկրատներ» կուսակցությունից Ալեքսանդր Արզումանյանը:

Մինչ այսօր բուռն քննարկումներ են ընթանում, թե ովքեր են եղել այդ երեք պատգամավորները: ԱԺ ՀԱԿ խմբակցության պատգամավոր Նիկոլ Փաշինյանը ֆեյսբուքում ավելացրեց իր քվեաթերթիկի լուսանկարը:

Այդ քայլից հետո քննարկումները թերևս ավելի թեժացան: Հատկանշական է, որ այդ լուսանկարի «մեկնաբանություներ» բաժնում Ալեքսանդր Արզումանյանը մեկնաբանություն է թողել.

«Դեմիրճյանի անվավերը հերքվել ա: Հաշվիչ հանձնաժողովի նախագահի հավաստմամբ' թե′ հրապարակային, թե′ մասնավոր անվավեր թերթիկներում ուղիղ գծով ջնջված են եղել թե′ կողմը, թե′ դեմը: Դեմիրճյանը ծիտիկի նշան է արել ԿՈՂՄ-ի կողքը' ենթադրելով, որ դեմ է քվեարկում: Այդ քվեաթերթիկը կողմ է համարվել Լյուդմիլա Սարգսյանի (հանձնաժողովի անդամ) համաձայնությամբ»,- գրել է պատգամավորը և մեկ այլ մեկնաբանությամ հավելել.

«Ես ընդամենը շարադրել եմ այն, ինչ ասել է Դեմիրճյանը: Պետք էր ջնջել ԿՈՂՄԸ` թե ինչ նշանով, դա էական չէ: Նա նշանը ԿՈՂՄԻ կողքն է դրել»: