«Անձամբ ես նման հարց չէի տա». Ա. Բախշյան

Հարութ Ուլոյանը ֆեյսբուքյան իր էջում գրել է.

Ես չգիտեմ, թե «Ժառանգության» ներկայացուցիչ Զ. Փոստանջյանին ի՞նչն է դրդել ԵԽԽՎ-ում Սերժին նման հարց տալ, բայց որ նման հարց հնչեցնելը տեղին չէր' դա հաստատ է: Հարցը եղել է հետևյալը. «Դուք եղե՞լ եք Եվրոպայում վերջերս կազինոյում և այնտեղ կորցրե՞լ եք 70 մլն եվրո»:

Ա. Բախշյանը, ով նույնպես «Ժառանգության» ներկայացուցիչ է, մեկնաբանելով Փոստանջյանի քայլը, շատ դիպուկ ասել է հետևյալը. «Անձամբ ես նման հարց չէի տա, նման հարց կտայի միայն այն դեպքում, եթե դա ապացուցված փաստ լիներ», իսկ Ի. Աբգարյանը, ով նույնպես «Ժառանգության» ներկայացուցիչ է, արտահայտվել է նման կերպ. «Նման ամբիոնից կարելի է հնչեցնել շատ ավելի սուր հարցադրում' մարդու իրավունքների, ՀՀ արտաքին քաղաքականության կուրսի կտրուկ փոփոխության վերաբերյալ և այլն»:

Այո, Սերժը կարող է և կազինոներում խաղում է, բայց քանի դեռ հստակ ապացույց կամ փաստ դու ձեռքիդ տակ չունես ու նման ամբիոնից նման հարց ես բարձրացնում, ապա հենց ինքդ ես հայտնվում, մեցմ ասած, վատ իրավիճակում: Եվրոպայի՞ն պիտի ցույց տրվի, թե Սերժը «ազատ» ժամանակ ինչով է զբաղվում, թե՞ մեր ժողովրդին: Եթե Եվրոպային, ապա Եվրոպան մեզանից շատ ավելի լավ գիտի, թե Սերժը ինչով է զբաղվում, կամ ինչ խաղեր է խաղում, ու ամեն ինչի մասին շատ ավելի փաստարկված տեղեկություններ ունի, քան մենք: Իսկ եթե այդ հարցադրումը արվում էր մեզ համար, ապա, վստահ եմ, մեր ժողովուրդը Սերժի հանդեպ, մեղմ ասած, վատ է տրամադրված ոչ թե կազինո հաճախելու, կամ չհաճախելու համար, այլ լրիվ ուրիշ պատճառներով:

Այնպես որ, նման ամբիոնից պիտի հնչեր այնպիսի հարց, որը կլիներ հիմնավորված, ու որը պիտի ծաղրի վերածեր, կամ գոնե հակադարձեր Սերժի կողմից ԵԽԽՎ-ում հայտարարված այնպիսի ցինիկ մտքերը, որոնցից էր, օրինակ, հետևյալ բացահայտ կեղծ միտքը. «Հայաստանն այսօր ազատ խոսքի ու ազատ մամուլի երկիր է, մենք ունենք հավաքների ազատություն, կայացած քաղաքացիական հասարակություն, որը գիտի, թե ինչ իրավունքներ ունի և ինչպես կարող է պայքարել իր իրավունքների համար»: