Լիբիայի ԱԳՆ-ն ԱՄՆ-ի դեսպանից բացատրություն է պահանջել Ալ Քաիդայի առաջնորդին ձերբակալելուց հետո

Լիբիայի ԱԳՆ-ն իր մոտ է հրավիրել երկրում ԱՄՆ-ի դեսպանին` բացատրություն պահանջելով Ալ Քաիդայի առաջնորդներից մեկի` Անաս Ալ Լիբիի ձերբակալության կապակցությամբ. գրում է AFP-ն: 

Անցյալ հանգստյան օրերին հակահաբեկչական գործողությունների արդյունքում ամերիկյան հատուկ ծառայությունների կողմից Լիբիայի մայրաքաղաք Տրիպոլիի մոտակայքում ձերբակալվել էր Անաս ալ Լիբին, ով հայտնի է նաև Նազիր Աբդուլհամադ ալ Ռուքաի անունով, և ում մեղադրում են 1998-ին Նայրոբիում և Դար էս Սամեում ԱՄՆ-ի դեսպանատան վրա կատարած հարձակման մեջ: Նրան բռնելու համար ամերիկյան իշխանությունները 5 մլն դոլար էին խոստացել:

Այս պահին նա գտնվում է Միջերկրական ծովում ԱՄՆ-ի ռազմա-ծովային ուժերի նավի վրա, ուր նրան հարցաքննում են հատուկ բանտարկյալների հարցով գործող միջգերատեսչական ծառայության մասնագետները:

Ըստ ԶԼՄ-ներում հայտնված տեղեկությունների` այս հատուկ գործողությունն իրագործվել է ԱՄՆ-ի նախագահ Բարաք Օբամայի հավանությամբ: Որոշ լուրեր էլ կային, թե Լիբիայի իշխանությունները տեղյակ են եղել կատարվող գործողությանը, սակայն վերջիններս հայտարարել էին, թե ոչնչից տեղյակ չեն եղել և բացատրություն են պահանջել ԱՄՆ-ից: