«Հայկական Ժամանակ». Ուրիշի փոխարեն քվեարկող պատգամավորները չեն պատժվի

Եթե ապացուցվի, որ նախօրեին ՀՀԿ պատգամավորները քվեարկել են իրար փոխարեն, դա կարո ՞ղ է հիմք հանդիսանալ, որ քվեարկությունները չեղյալ համարվեն։ «Հայկական ժամանակ»-ի թղթակցի հարցին երեկ ԱԺ պետաիրավական հանձնաժողովի նախագահ Դավիթ Հարությունյանը պատասխանեց.«ԱԺ-ն չի կարող դա անել, դա կարող է անել միայն սահմանադրական դատարանը, եթե սահմանադրությամբ նախատեսված սուբյեկտները դրա համար դիմեն ՍԴ»:

ԱԺ ՀՀԿ խմբակցության ղեկավար Գալուստ Սահակյանն էլ երեկ, հղում անելով ԱԺ կանոնակարգ օրենքին, ասաց, որ եթե տվյալ պատգամավորը հարց բարձրացներ և կոնկրետ նշեր տեղերը, թե ով է բացակա, և նրա փոխարեն քվեարկում են, ձայների քանակից կհանվեր, կամ էլ՝ օրիագիծը կրկին պետք է դրվեր քվեարկության, եթե պարզվեր, որ դա քվեարկութայան վրա էապես ազդում է. «Դա որևէ այլ իրավական հետևանք չի կարող առաջացնել: Հետքննչական պրոցեսի ենթակա չէ դա»:

Հիմա որևէ ձևով ուրիշի փոխարեն քվեարկած պատգամավորները չե՞ն պատժվելու , անգամ նկատողություն չե՞ն ստանալու ՝ այս հարցին էլ Սահակյանը պատասխանեց. «Պատգամավորին ո՞վ իրավունք ունի նկատողություն տալ: Սա հիմնարկ չէ»: Ըստ նրա, պատգամավորների հետ կարող են ընդամենը զրույց ունենալ այդ թեմայով: Սահակյանը նաև հավելեց՝ այնպես չէ , որ միայն ՀՀԿ-ական պատգամավորներն են իրար փոխարեն քվեարկում. «Դա բոլորի մոտ էլ ստացվում է , իմիջայլոց՝ նաև բողոքողների մոտ:Մենք էլ ենք շատ բան տեսնում, բայց որովհետև մենք մեծ ենք, չենք ուզում փոքրանալ, նրանք փոքր են՝ ուզում են մեծանալ»: Թերթը հիշեցնում է, որ ԱԺ հինգշաբթի օրվա նիստը աչքի էր ընկել ուրիշի փոխարեն քվեարկելու ՀՀԿ-ականների զանգվածային գործողություններով: